股海實戰：光控估值重現吸引力

港股昨日隨外圍高開，恒指最高見22,817點，收報22,770點，升372點，成交增至792億元。金魚缸人氣回升，第三季首個交易日來個「開門紅」，「七翻身」在望！

阿莊估計，短線中港兩地股市持續反彈機會較大，主要原因係市場重現利好消息，且對利淡消息沒有多大反應。就如近日國務院副總理王岐山喺河北考察，指要實現全年經濟社會發展目標係一件艱難嘅事情。不過，A股表現未受此言影響，滬綜指以接近全日最高位2,812點報收，深、滬兩市主板總成交額更超過2,400億元人民幣。

政策微調利好後市

依圖表走勢，短線滬綜指喺2,850點水平會遇到較大阻力，回吐須考驗50日線2,789點承接。若然今次A股真係要重拾升浪，10日線2,731點不容有失。

講到A股，最近中金亦發表報告，指踏入第三季度，中國已經到了政策微調嘅關鍵時刻，若不加以調整，中國經濟喺第四季度至明年上半年可能出現較大嘅風險。換句話講，第三季A股能否進一步反彈，要視乎政策微調有否如期出現。

最近加快落實興建保障房、着手解決中小企融資難問題、推進個稅改革、檢討汽車業政策、加快實施關稅下調政策，都可視為「微調」前奏，且看會否有更多好消息跟尾。

受惠A股氣氛改善

本來計劃本周展開招股活動嘅光大銀行，傳聞因定價事宜暫延招股活動。事實上，內銀來港上市已屆「水尾」，加上近期不斷有內銀股喺市場進行大額融資，今次光銀招股集資規模亦唔細，冇番咁上下嘅承銷隊伍陣容真係唔容易應付，且看雙方討價還價過後，月底前能否開展招股活動。

提及光銀，順道睇睇隻光大控股（00165），A股氣氛逐步改善，無疑對光控有利，尋日該股收報15.36元，升3.37%，成交9,850萬元。次季光控股價由高位19.12元回落至上月低位13.24元，累跌近三成，主要反映A股不濟對旗下金融業務帶來嘅負面影響。

不過，光控現價往績市盈率12.9倍、市帳率0.94倍、息率2.8厘，估值經已去除水分，若然第三季宏調政策微調，A股重現活力，光控可視為值博之選，目標重上次季高位19.12元，失守14元止蝕。

今日阿莊想順帶提一提昔日愛股中芯國際（00981），最近公司董事會主席兼獨立非執董辭世，想不到風波驟至，事緣喺六月廿九日舉行嘅股東大會上，有關重選總裁、首席執行官王寧國為第一類董事嘅議案，居然遇上58.21%票數投反對票而不獲通過，顯見各主要股東間對高層任命存在分歧。

雖然阿莊慶幸此刻非其小股東，但睇見隻股命途多舛，都覺無奈，正所謂「和氣生財」，希望早日平息風波，齊心搵錢至上！

戰報

精電（00710）

阿莊上周一「mark中」精電，股價由當日低位4.63元，飆至昨日高位5.12元，跟佢入貨，賺逾一成。

歐舒丹（00973）

史提芬上周三推介歐舒丹後，股價隨即狂飆，由當日低位18.98元，抽升至昨高位21元，賺近11%。