股海實戰：天津發展重組博翻身

眨眼又過半年，呢段日子缸邊友日子難過。不過，幾難過嘅日子都已成為過去，踏入第三季，正能量有望回升，年尾埋單計數，可以食魚翅抑或要捱粉絲，都係睇呢季表現！

尋日恒指先升後回，收報22,061點，微跌0.6點，成交依然淡靜，僅622億元。指數表現無甚足觀，反而個別板塊幾醒神，除濠賭股外，「手袋股」亦乘機揭竿起義，繼周一掛牌嘅理文手袋（01488）炒高後，半新股米蘭站（01150）亦發圍，一口氣搶高至2元樓上，收報2.15元，升15.59%，相信冇咁快炒完，短線回吐守穩2元樓上可跟炒，博上2.4元，跌穿2元走人。

呢幾日被人瘋狂洗倉嘅雨潤（01068）股價終於喘穩，高位做21.2元，收報20.7元，升6.8%，成交20.3億元，沽空額回落至2.2億元。查實民企股風險較一般紅籌及國企股為高，唔係新聞，至於呢期先後有本地以至美國掛牌民企受空軍「襲擊」，相信都係睇準一個大環境因素，就係內地市場流動性緊張，班祖國炒家五行欠「水」，想托價亦力不從心。

大行花旗及摩通近日都先後發表報告，提醒投資者目前港股估值處於低水平。旺市股票貴一貴都有人追、淡市股票幾平都冇人吼，可以話係魚缸定律。以目前港股預測市盈率僅十一至十二倍左右，確已重現吸引力，加上年內美息唔見得有郁動嘅條件，游資終歸要尋找出路。只要第三季內地通脹確認見頂、市場流動性逐步改善，好友自有表演嘅機會！

持盈保泰伺機出擊

目前阿莊持倉現金約300多萬元，若然七月份圍繞中國市場真係見到更多正面因素出現，會考慮全力出擊，焦點股包括即將登陸內地國際版嘅滙控（00005）同中移（00941）、已頗大程度消化復建居屋因素且估值低迷嘅地主股，以及內地保險股。

講到組合持股，手持嘅金威啤酒（00124）近日營造出圓底回升之象。聽聞青啤（00168）打算斥資8億銀喺廣東起廠，可見喺龍頭廠家眼中，粵省戰略地位毋庸置疑。客觀嚟講，粵政府增持金威股權至73.8%後，洽售金威嘅條件更加成熟，呢鋪生米煲唔煲得成熟飯，即管等着瞧！

同屬紅籌，尋日天津發展（00882）股價有睇頭，高位見4.75元，收報4.73元，升5.11%，成交2,657萬元。津發股價由年初高位7.74元回落至本月低位僅4.08元，累跌達47%，差強人意，主要反映喺退出公路業務及財政補貼政策改變之下，盈利前景不明朗。

股東背景實力雄厚

公司現價市帳率僅0.56倍，照計再跌嘅空間有限，未來能否重現生氣，要視乎參與天津市國有資產重組嘅進度。回想起當日粵投（00270）嘅翻身戰，阿莊認為津發喺天津市政府同母公司嘅大力支持之下，前景毋須過分睇淡，不妨密切留意業務重組消息，捕捉入市機會。

戰報

米蘭站（01150）

米蘭站上周二被錢進睇中，推介當日低位只係1.85元，昨日大發神威，高位見過2.18元，進帳近18%。

首鋼資源（00639）

阿莊上周三睇中隻首鋼資源，由推介當日低位4.24元，抽升至昨日高位4.79元，累計賺近13%。