魚缸Blogger：中材表現唔失禮

尋日係期指結算，但市況並無出現大幅波動，最終恒指跌唔夠1點，成交維持在620億元水平，似乎大戶同老散都睇實希臘國會的表決。

新股市場繼續輪流排隊cap水，其中隻青蛙王子（01259）不妨望多兩眼，事關市傳招股價下限估值十倍都唔夠，足足較博士蛙（01698）同埋隻好孩子（01086）平一半，後兩者當然亦具有影子股概念。

加強西北市場布局

在上落市之中，強勢板塊始終長炒長有，水泥股便乘着水泥產品連月價量齊升，加上保障房等概念跑贏大市，行業龍頭安徽海螺（00914）同中建材（03323），股價已差唔多返番去四月份嘅高位，唯獨在西北地區擁有領導地位嘅中材股份（01893），現價仍較四月份高位低近兩成五。

其實，中材今年首季業績唔失禮，純利大增1.51倍，至2.01億元人民幣，加上集團食正西部大開發概念，近年積極加強喺西北水泥市場嘅布局，而往績市盈率十七倍，亦低過海螺同中建材近二十倍嘅水平，有追落後價值，若能守穩10日線6.12元，目標可上望7元關，穿5.8元止蝕。

中材股份（01893）

目標價：7.0元 止蝕價：5.8元