Fundman睇市：買資源股博有QE3

溫總講一句，好過股票專家講一萬句。溫總上星期在外訪前夕，於鬼佬媒體上撰文，提到內地通脹已經受到控制，中港兩地股市，猶如打咗強心針一樣，恒指大升412點，收報22,171點，扭轉六月初至今的頹勢，貢獻指數最多的，包括發市當三年的中移（00941），及近期備受策略股東減持消息困擾、沽空多到極的內銀股。

老實講，睇到溫總在FT講到實牙實齒，史提芬第一個感覺係「有冇搞錯」，仲記得兩星期前，內地公布五月份通脹升到三年高位，去到5.5%，符合預期的數字，加上預期六月可能見頂，中港股市第一個反應是急升，翌日人行立即出手再加存款準備金率到21.5%歷史高位，明顯是衝着市場對通脹即將見頂的預期而來，暗示人行對付通脹預期復燃絕不手軟，畀市場一個下馬威。

由人行兩星期前的硬，到溫總兩星期後的立場軟化，到底股民可以信邊個？美銀美林最先出來唱淡，認為溫總的撰文立場，是中國人傳統的內外有別行為，對內強調困難，對外強調成績，儘管下半年通脹應該可以受控，但內地流動性管理，M2緊盯16%的目標應該唔會有變。簡單嚟講，係唔好開心得太早。

債王轉軚有玄機

一直睇死聯儲局唔會有QE3的全球最大債券基金PIMCO掌舵人，人稱債王的格羅斯（Bill Gross）突然轉軚，預告美國最快八月份就會推出QE3。筆者只係想到有兩個可能令債王咁做，一就係債王要為旗下基金今年慘淡的業績開脫，皆因債王估QE2之後，美債會失去一大買家而偏軟，今年早早已開始沽空美債，而實際情況係今年美債強勢持續，最近十年債息連2.9厘都無，比年初的3.4厘低出不少，意味着佢手上嘅美債空倉，瓜多過菜。

又或者，債王睇到我哋睇唔到，八月Jackson Hole全球央行會議前，美國經濟數據差到極，股市下瀉，逼聯儲局出手打救。筆者已經講過，兩次QE其實都係股市逼出嚟，第一次道指一日插777點，第二次係Jackson Hole開會前大半個月，跌咗近7%，今次向邊一個方向發展，筆者拭目以待，不過上星期五美國耐用品定單數字算係Pass，美股一樣由頭插到尾，八月前無論大小反彈，最好都唔好信到十足，環球股市在美國停印銀紙期間，難免有外強中乾之感。從預託證券跌幅，恐怕港股上周五的點數進帳，至少要跌番一半出街。

兗州煤業可考慮

假如真係會有QE3，今日到底應該點做好？大家不妨回顧QE2，美國經濟唔好得幾多，但明顯推高股市同商品價格，期間亞洲貨幣亦升咗唔少，新興市場資產泡沫愈吹愈大。不過，由日本同美國兩次量化寬鬆的歷史，告訴我們政策同人類濫用抗生素一樣，隨着產生抗藥性，威力會一次比一次細，故即使今次資產價格仍升，升幅亦可能不及QE2，但無論如何，金股及能源股都可優先考慮。

筆者睇中估值偏低的煤股，事實上內地煤價仲有上升空間，考慮埋產量的提升，最睇好兗煤（01171），唔知啱唔啱看官胃口？