太子手記：王兟出任上市委員
港交所（00388）新一屆上市委員會成員，加入咗三名新成員，其中一位係TOM集團（02383）前首席執行官王兟，佢依家係TPG全球合夥人及TPG大中華區聯席主席。
另一位亦來頭唔小，係UCL Asia董事總經理雷剛，UCL係香港主要私募股權集團之一，雷剛曾為已故知名人士Sir James Goldsmith擔任投資總監達十七年，現為意大利Agnelli家族控制嘅投資控股公司EXOR SPA投資總監。至於第三位上市委員會新成員，就係德勤．關黃陳方會計師合夥人Stephen Taylor。
交易大堂料續租
另外，陪伴港人多年嘅港交所交易大堂，今年十月約滿，港交所於明年第四季將證券市場嘅主要數據中心搬去將軍澳新一代新數據中心，如無意外，港交所會續租交易大堂。市場人士估計，呎租起碼要過100元。