股海實戰：西部水泥中線諗得過

聯儲局會議聲明冇料到，美股前晚低收，港股尋日跟隨低開，恒指全日低位21,632點，午後A股報升收市，恒指一度回升至21,905點，惜高位始終缺乏承接，結果跌100點收市，報21,759點，全日高低波幅273點，成交649億元，期指低水75點。

下周三係期指結算，翌日又係基金半年結，跟住就係香港回歸長假，此前除非港股能以大成交重上22,000點樓上，否則相信願意入場買貨嘅缸邊友着實不多。股市唔升就跌，阿莊依照原定計劃，一旦跌穿21,000點水平，會開始留意撈底機會。

外資繼續唱淡中國

前日至講過老外擬「做空中國」嘅傳言，近日再有海外評級公司表示，近兩年內地經濟發展靠寬鬆貸款支持，結果造成今日嘅通脹急升及房地產泡沫，部分相關貸款嘅中期還款能力成疑，並足以對內銀信貸評級以至中國主權評級構成下調風險，總之係口淡淡！

不過，中國有句老話，叫做「出其不意」。阿莊早前亦提及，唔少內地基金認為六月份CPI將會見頂，下半年A股可望扭轉頹勢。畢竟「錢荒」係今次A股跌市嘅元兇，只要通脹及內房泡沫受控，市場銀根得到鬆綁，A股的反彈力度不容小覷。只係呢一日來臨之前，大家都要繼續沉着應戰。

尋日A股升市，滬綜指升38點，收報2,688點，兩市總成交額達到1,572億元人民幣，按日增加348億元人民幣。見到尋日Shibor一周及兩周息率均升穿9%，反映資金面仍然係異常咁緊張。喺咁「水緊」嘅日子下，仲有錢入場掃貨，斷估非等閒之輩，會唔會又係國家隊所為，就要做事後孔明！

仍停留喺金魚缸嘅炒家，繼續喺幾個周期性板塊炒出炒入，呢輪建材股反彈浪幾唔錯，事關下半年內地有大量保障房開工，將帶動建材需求，基本面有利好因素支持，「空」軍始終有所顧忌。

水泥行業前景樂觀

最近高盛就為水泥行業做了一個壓力測試，假設明年內地經濟增長7%，水泥行業嘅平均售價及產量均告零增長，則該行所覆蓋嘅四家水泥公司（其中三家係港股：中建材（03323）、金隅（02009）及海螺（00914）），增長仍可高於過去平均水平。該行又認為，水泥股估值進一步下行空間有限，水泥價格將繼續趨升，利好行業發展。

咁啱近日西部水泥（02233）宣布，斥資5.3億元人民幣投資水泥合營項目。投行對有關交易反應正面，事關此舉可鞏固公司喺陝西省水泥市場嘅地位，並可透過投資新型幹法生產工藝嘅生產線，省電省煤，配合環保政策大趨勢，免卻部分傳統生產線嘅資本性開支，又能達致預期嘅擴產效果。

西部水泥現價2.83元，預測市盈率約九倍，2.5至2.7元係一個大型支持區，可以諗諗中線部署。

戰報

中國建築（03311）

中國建築尋日最高升抵7.79元，積奇上周五已作推介，當日低位只係7.03元，跟炒一轉賺近11%。

中聯重科（01157）

冼金基上周二推介隻中聯重科，當日低位12.692元，尋日高位13.94元，跟到足有近一成進帳。