太子手記：蘇繡大師金葵贈招行
永隆同母行招商銀行 （03968）喺啱啱過咗嘅禮拜日，請咗超過30個招行蘇州私人銀行同企業銀行嘅客戶，嚟香港沙田馬場馬會會員私人廂房，齊齊睇跑馬仔，聽講客戶好識得「禮尚往來」，向管理層「獻花」，呢朵價值連城嘅花，係一件中西合璧藝術品！
太子聽講，其中一個出席嘅客戶係蘇州「姚建萍刺繡藝術館」館長姚建萍，係國家級蘇繡傳承人。
梵高名作變身蘇繡
佢好有心思咁根據梵高嘅名作《向日葵》，創作一幅《向日葵》蘇繡，將中國傳統技藝融合喺西方著名畫作入面，仲要配番永隆同招行嘅金葵花 （向日葵別名）理財品牌。太子打聽過一幅咁名貴嘅藝術品身價，高達400萬元，永隆呢份禮真係收得心花怒放。
招行副行長丁偉（左一）同永隆總經理徐志宏（右一）接受姚建萍（左二）送嘅《向日葵》。