股海實戰:首鋼資源可分注入市

港股連跌五個交易日後,尋日終於威番一次,恒指升251點,收報21,850點,成交697億元,其中建行(00939)、工行(01398)、中行(03988)、農行(01288)四大內銀成交額已佔去13%。聽聞美銀唔打算一次過盡沽建行股份,定過抬油嘅空軍一族正密切注視美銀持貨去向。

講開內銀,市傳近次調高RRR本周一生效當日,人行向兩家內銀實施為數共500億元人民幣嘅逆回購,變相「輸血」,以防資金鏈出問題,是真是假不得而知。事實上,端午節前,市場一直猜測人行會加息,但結果到今時今日仍未成事實,取而代之係再加RRR。雖然人行話RRR冇頂,但大家對再上調RRR嘅空間心中有數。

那末為何不早早直截了當加息?相信人行必然係有所顧忌。據市場統計,目前政府融資平台嘅貸款以及房地產貸款,分別佔去金融機構貸款餘額嘅17%及20%,相信人行擔心的是一旦再加息,會對地方財政造成影響,並可能令銀行房貸違約率上升,影響銀行體系穩定。

最近跟基金界嘅友人聚會,席上聽到有位仁兄講,如今喺老外對沖基金圈子,都在熱衷於「Get short on China」(做空中國)概念,這可透過沽空美國上市嘅中國企業股份,又或是購入香港國企紅籌股嘅認沽期權方式進行。

沽空中國成共識

筆者聯想起近日高盛建議客戶平倉規避短期人民幣匯率風險,以及瑞信調低了中國經濟展望預測,兩者似乎來得有點巧合。睇嚟賭中國經濟「硬着陸」嘅外在力量正在上升,話唔定歐洲債務問題同美國國債事件會助空軍一把,所以到呢一刻為止,阿莊都唔敢講港股已見底,投資者宜自求多福。

再睇個別中資股板塊,內地五部門聯手專項清理收費公路,引發公路股大跌,有報道指調查發現個別高速公路投入成本9.8億元人仔,但收益卻高達28億元人仔,真係肥過食肥仔水!不過,由於相關政策影響地方政府收入,會唔會係有頭威冇尾陣,如何平衡既得利益者嘅利益,仲要等着瞧。尋日公路股普遍反彈,其中成渝高速(00107)及深高速(00548)分別升7.34%及8.7%,但搞清楚政策影響前,博反彈要適可宜止。

尋日煤炭股有表現,神華(01088)及兗煤(01171)均升3%,主要係內地動力煤價格連升三周,煤炭股被游資睇上翻炒一轉。講到煤炭股,專門產銷焦煤嘅首鋼資源(00639)(前稱「福山能源」),尋日股價亦升逾3%,報4.32元。

游資翻炒煤炭股

睇番幅走勢圖,自去年中以來,3.9至4元係一個大位,不宜有失,短期可觀察相關水平支持,守得住,則可開始留意建倉機會,但補充一句,參考去年第三季嘅走勢,唔排除股價可能要喺低位徘徊一段時間,故入市毋須急進,宜分注行事。

戰報

華建控股(00479)

錢進於五月二十六日推介華建(00479),尋日曾搶高至0.97元,以當日低位0.86元計,賺近13%。

人和商業(01387)

姚午齊周一睇中隻人和商業(01387),當日低位只係1.34元,尋日高位做1.47元,短炒賺近一成。

跨媒體地產網新居入伙 幾萬個精選樓盤 歡迎睇樓!

「Money18免費即秒股票報價網站」現推出8升級功能,財經資訊,實時實發!

阿莊