短炒倉：康哲藥業雙底回升

跌市跌到人都麻木晒，唔知係咪因為唔少股民輸到病嘅關係，上周五部分醫藥股反而逆市做好，其中聯邦制藥（03933）升3.4%，連隻上市咁耐跌足咁耐嘅四環（00460）都反彈1.6%，但最搶眼嘅仲係康哲藥業（00867），升幅達4.8%，收報8.17元。

法改委的藥物限價令，令四環等藥物生產商即時被打沉。不過舊年九月上市嘅康哲，由於業務模式有別，主要係向內地醫院分銷海外藥廠所生產嘅專利藥物，即係藥物進口批發商，故受限價令的影響輕微，去年度盈利更錄得47.9%增長，賺3,058.7萬美元，每股盈利3.06美仙。

收購配合國策方向

商務部早前發布了「藥品流通規劃」，目的是要打造銷售額過千億元人民幣的全國性醫藥航母，政策明顯向大型業者傾斜，康哲早前亦以約15.49億元港元，收購了主力銷售內地製藥公司藥品的天津普瑞森，可見已為迎合國策做足準備。

康哲股價上月和本月先後兩次於7.6元水平形成雙底，上周五一舉升穿10日和20日線，強勢初現，短線料有力重返月初高位，目標9元，止蝕7.6元。

康哲藥業（00867）

目標價：9.0元 止蝕價：7.6元