股海實戰：青啤估值具上調誘因

金魚缸「六絕」係點？恒指喺本月上旬失守250日線，中旬再失守今年低位，並跌穿橫行大半年嘅通道，最近十二個交易日足足跌咗十一日，咁嘅跌市夠唔夠「絕」？本來阿莊都冇咩興趣估底，但觀察到上周五金魚缸嘅氣氛真係極端偏淡，以「逆大道而行」嘅投資思維去諗，唔排除等恒指插穿21,000點關，便可觸發一次大反彈。

近次內地調高RRR，將於本周起生效，市場流動性勢必進一步趨緊，滬綜指上周五收市報2,642點，已失守一月份低位。股指低迷嘅情況，充分反映喺中國人壽（02628）嘅股價身上，上周其股價失守26元關後，跌勢轉急，上周五曾低見24.3元，再睇落去就要見前年初嘅支持區20至23元區域。呢隻昔日股民愛股，過去年多一直跑輸平保（02318）及財險（02328），長情小股東真係日子難過！

講到散戶奇兵，上周見到大笨象（00005）股價喺78元及76元均曾出現逾千買盤護航，誰知全部被擊倒。上周五大笨象收喺76.05元，但圍繞國際金融類股份嘅壞消息不絕，別對反彈力度存太大期望。

內銀股暫宜忍手

除咗大笨象之外，上周五內銀股亦見到有散戶築起「長城」護航，大家都抱住「跌咗咁多，溝一溝貨」嘅心態入市，阿莊亦唔想阻人發達，但就要叮囑各位，內銀股嘅盈利高增長期已暫告一段落，反觀近期嘅融資潮餘波未了，能夠忍手嘅，宜盡量忍，即使真係好想增持作長線投資，亦宜盡量分注入場，切忌急進行事﹗

除咗內銀股之外，本月上旬表現跑贏大市嘅騰訊（00700）及聯通（00762），上周變為基金提款對象，騰訊股價挫4.2%、聯通（00762）跌幅更達5.6%。國企股方面，阿莊早已預告，今次跌市公路股避險功能會失靈，結果果然言中，上周五成渝高速（00107）股價急挫12%，事關公司係受今次有關公路收費政策改變影響最大嘅股份。阿莊估計未來六個月公路股都難有運行，可以睇少一瓣。

大型國企股青島啤酒（00168）上周五收市報42.55元，跌2.07%，股價距離五十二周高位46.6元並不遠，算係表現較堅挺嘅大型國企股。

青啤最近公布了新嘅策略規劃，具體係喺未來的三年，期望產銷量目標能突破1,000萬千升，並且擬落實多年嘅計劃，即喺海外建設廠房，藉以加快推動國際化戰略。

加快國際化部署

換言之，青啤將一改經營海外市場嘅模式，從以往將本土生產啤酒出口，改行「地產地銷」嘅策略，相信呢個策略上嘅突破，可成為引發估值重估嘅誘因。

目前青啤股價尚處於二月低位34.8元所延伸的上升通道，通道底部支持剛好喺250日線40元水平。不妨留意股價在此水平的承接，再作中線部署。

戰報

雨潤食品（01068）

May於六月二日推介雨潤，當日低位曾見25.95元，上周五高位曾做過28.7元，累計賺近11%。

中國食品（00506）

Sammi於六月三日睇中嘅中國食品，上周五高見6.3元，以推介日低位5.73元計，最多賺近一成。