李德麟領導浙江同鄉

本港金融界浙江幫有不少，前金銀業貿易場理事長李德麟就係其中一個，近日佢更當選為新一屆香港浙江省同鄉聯合會會長，將於本月二十七日舉行就職典禮。

當選同鄉聯合會會長

李德麟家鄉喺浙江寧波，佢本身係浙江省政協常委，父親係李和聲，多年來家族經常做善事，好支持家鄉嘅發展。今次喺芸芸浙江幫中，當選浙江省同鄉聯合會會長，都算實至名歸。

據一名金融界前輩同太子講，本港嘅浙江幫猛人真係好多，仲要係粒粒巨星，數數手指，包括有陳廷驊、查懋聲、邵逸夫、胡鴻烈、曹光彪及已故包玉剛等，真係為浙江人爭光。

改革金銀貿易場有成

講番李德麟，佢做事一向好上心，記得佢做金銀業貿易場理事長時，倡議大力改革貿易場，雖然有啲保守派可能會對改革步伐有保留，但佢仍然堅持自己想法，又搞電子交易平台、從業員發牌制，希望貿易場納入監管。

依家金銀業貿易場改革已有一定成績，電子交易平台成交不錯，又積極籌備推出人民幣公斤條產品，最重要係金銀業貿易場個牌價翻幾番，已升到幾百萬元，李德麟應感安慰。