太子手記：中港監管機構九寨溝碰頭
近年中港金融合作頻繁，中港監管機構互相碰頭機會亦好多。好似上交所、深交所、港交所（00388）、中證監及香港證監會等監管機構，會定期按監管合作備忘而召開會議，佢哋上個月會議地點係四川名勝九寨溝！
九寨溝出名風景如畫，令人心曠神怡，喺嗰度開會可能真係醒神啲，唔信大家睇吓港交所行政總裁李小加。
李小加出差精神好
李小加去完九寨溝開會，又風塵僕僕去咗美國，早幾日佢接待港澳辦主任王光亞參觀港交所時，仍然精神飽滿！
除咗九寨溝，過往佢哋亦去過香港迪士尼樂園、黃山、內蒙開會，真係各具特色。
點解開會要擇呢啲地方呢？原來佢哋覺得開會最好遠離辦公室，等大家諗嘢更集中，思維更清晰。亦可以借呢個機會，增進及培養感情。
中港監管機構最近去九寨溝開會，李小加都有參加。（資料圖片）