股海實戰： 中軟國際具承接力

上周四政府賣地未有成就天價新地王，但市場對於樓價高企嘅意見愈來愈大，最終迫使政府再度出招，上周五金管局宣布下調所有樓價嘅按揭成數，發展局宣布新一季加推地皮，都算係落重手，難怪地主股幾乎全線「大飲茶」，估計市場需要時間消化新措施影響。

既然眼前樓市泡沫嘅存在毋庸置疑，及早着手拆彈當然係比等爆好。好在去年末季以來4隻大地主股嘅股價走勢跟樓價升勢逆向而行，現時嘅估值算係踏實，故因地主股爆煲而拖冧大市嘅可能性不大。

近來圍繞中資股嘅負面消息不絕於耳，除了宏調持續、市場流通性緊張、營商環境轉差、經濟增長放緩之外，內房股積弱、內銀股受融資潮所困，令傳統驅動A股表現嘅「雙摩打」失靈。

外因方面，近日出現赴海外掛牌嘅新興產業中企股備受會計違規指控，更有指美國證券交易委員會已成立特別小組調查多家紐約上市嘅中企，消息引發拋售潮，IT股災情嚴重。見到上周五騰訊（00700）沽壓亦增加，低位202元，收報204.8元，跌2.8%，成交15億元，沽空額2.3億元，而阿里巴巴（01688）亦創五十二周低位，收市跌逾4%，報11.66元。

內外因素困擾之下，往日力撐港股嘅「紅色」力量自身難保，難怪恒指上周失守250日線後彈也不彈。阿莊重申恒指三月份低位22,123點不容有失，缸邊友宜自求多福。

內地股市吹淡風

此外，阿莊亦聽聞呢期內地B股股災，唔少基金都受重創，有指原因係國際板愈走愈近，引發B股重估潮

另外，創業板指數亦喺憂慮解禁潮下創出新低，可見圍繞內地股市一面倒嘅大淡風，確實係近年鮮見！本周內地公布嘅經濟數據，會係有助撥開迷霧，抑或喺傷口灑鹽？好快會有答案！

為了緩解內地中小企業嘅經營壓力，上周傳來當局將會採取措施降低企業的物流成本，當中包括推出稅務優惠以及降低公路收費等措施，有關消息不利公路股。本來跌市中公路股憑着收益穩健以及高息可視作避險之選，但係呢次情況唔同，避險功能要打折。

個股方面，早前中軟國際（00354）獲內地聯想控股旗下嘅基金弘毅入股，消息刺激中軟股價上周三復牌當日急升逾兩成，其後回軟，上周五收報2.12元。

引入重量級股東

是次中軟與內地IT業巨擘達成策略合作，配售1.5億股新股，每股作價1.86元，集資2.79億元，可惜呢期海外掛牌中資IT股水深火熱，或多或少影響了氣氛，而與新股東進行策略合作成效亦需時顯現，故料短期中軟股價會以整固為主，惟過去大半年股價在1.8至2.1元營造出大型橫行區，再參考今次批盪價，料相關水平具承接力。

戰報

恒芯中國（08046）

May上周四推介嘅恒芯中國又有收穫，若當日低位1.08元上車，周五高位1.19元食胡，兩日賺逾一成。

Z-OBEE（00948）

錢進上周三睇中嘅Z-OBEE表現堅挺，周五高見2.2元，跟佢推介日低位1.97元走番轉，短炒賺近12%。