太子手記：惠記單偉彪獨愛橋牌

太子平日都有好多嗜好，除咗shopping，仲會玩吓唔同嘅運動。但喺惠記集團（00610）嘅副主席單偉彪，就只好一種玩意—橋牌。對橋牌全情投入嘅單生，仲做埋香港橋牌會嘅主席添。

同政商名人切磋

佢同太子講，做橋牌會主席好忙，好多嘢要搞，好似佢哋今個月就會去馬來西亞，參加亞太區嘅比賽。

講起橋牌，太子只係知道要四個人一齊玩，單生咁忙，咪好難約齊腳打牌，單生話依家可以上網打。據佢所知，喺中港識玩橋牌嘅政商名人都唔少，當中部分仲同單生玩過橋牌添。單生仲話，玩橋牌唔係為咗傾生意，因為喺玩橋牌嘅時候會全情投入，其他嘢都唔記得晒。

太子以為咁多高官名人玩橋牌，一定好難入會，但單生話入會費原來只係400蚊，單生仲話橋牌易學難精，等太子有時間都要好好咁學吓。

據太子了解，單生私人都有贊助呢個橋牌會，可謂出錢又出力支持香港橋牌會。

至於佢哋集團旗下嘅龍舟隊，已經成立咗好耐，單生自己就無落場玩，但得閒都會去打吓氣。