Fundman睇市：建行短期受壓難免

近期港股真係睇見都眼冤，好在昨日有賣地至無咁悶，最終波老道豪宅地及元朗蚊型地，同樣由分析員估年底淨負債跌至「零」，大把水的長實（00001）投得。或者地產商都怕觸動無殼族嘅神經，促使政府再出辣招對付樓市，波老道地皮以接近市場預期下限的116.5億元成交，差些少至破到信置（00083）九七年投得小西灣藍灣半島現址地皮的118.2億元歷史紀錄。

雖然話長實買地買得「平」，但以樓面呎價2.67萬元計，加上兩成毛利，估計落成後至少都賣3.5萬1呎，美銀美林估發展商會興建160個單位，每個單位約3,000呎，換句話，未來波老道將會遷入至少160個億萬富豪住客。由長實、信置及南豐等的激烈競投程度可見，上億元豪宅的確有價有市，但同樣反映出發展商根本唔信坊間吹風，話特區政府研究限制非本地居民買樓的限制，未來豪宅價定必更癲，天比高之後，睇怕呎價上破10萬的豪宅好快出現。

領匯收購陸續有來

另一地產消息，筆者愛股領匯（00823）宣布向南豐收購將軍澳南豐廣場的商業部分，作價11.7億元，將連208份租約購入，每月租金收入約407萬元，連埋同意續訂及新訂租約，成交期後，租金收入每月會升至421萬元，等於4.3厘租金回報。

對市值600億的領匯來說，收購的即時幫助唔大，事關交易規模只約等於去年底資產淨值549.7億的2.12%。可是，領匯本身可容許債務上限是45%，交易後，負債對資產總額比率亦只是由15.1%增加至約16.6%，意味着領匯差不多可以增加負債比率接近三成，繼續從私人市場收購商場擴大業務範疇，營運槓桿提升有助改善回報，史提芬會繼續期待更多的收購消息曝光。

恒指尋日跌51點，報22,609點，250日線22,611點終於守唔住，罪魁禍首係內地銀監草擬的《資本充足率管理辦法》進入諮詢期，大孖沙擔心內銀股為符合新資本充足率，可能要集資甚至減少派息，尋日3隻藍籌內銀股都去到近四個月低位，3隻股票佔指數跌幅57點之多。大行計過數，如果政策落實，大銀行可以唔使集資，但減低派息難免，至於細銀行，即使派息減到零，每間仍然需要額外籌集15至35億美元，不過講緊係二○一六年嘅事，股市會唔會敏感咗些少？而對大銀行的影響又是否太誇大？看官不妨想想。

屋漏偏逢連夜雨，早前市場流傳，有投行為建設銀行（00939）大手交易試盤，估計係美國銀行手上八月底禁售期到期的255億股想放售。

基金沽定等接平貨

筆者覺得美銀放售建行，一啲都唔出奇，既然上次○九年五月每股4.2元都肯沽，更遑論今日的6.87元！事實美銀近幾季業績一無是處，沽建行套現做靚盤數，屬人之常情。昨日所見，春江鴨開始積極沽空建行，昨日8,858萬股沽空，佔全日成交15.3%，是今年第三高紀錄，沽空金額6.09億，更係去年十一月以來最高。

如此情況，令人回想起○八年底○九年初，當時同樣全世界都知美銀要沽貨，大孖沙透過沽空建行，等折讓價接批股貨賺差價，當年唔少對沖基金就靠這個交易賺了大錢。食髓知味，筆者相信建行短期肯定受沽空盤影響，但這亦為中長線投資帶來入市良機，補倉完成後，股價將再度飛揚，不妨在八月底九月初之前，慢慢等機會收集。