股海實戰：北控投資價值顯現

呢頭講完，嗰頭恒指就跌穿250日線，沽空金額更增至86億元，內銀股沽壓沉重，二、三線輪流現「股災」，令人擔心港股尚有兇險在後頭，提防一旦恒指失守三月低位22,123點，金魚缸將會展開新一輪逃亡潮！

尋日賣地成市場焦點，半山地皮以市場預期下限價格成交，兩幅地皮得主同為長實（00001），反映大地主仍積極吸納靚地，只係大家都好識做，舉到咁上下就停手，非必買不可，免令政府尷尬。

事實上，近期開始愈來愈多聲音要求復建居屋，甚而推出措施限制內地投資者來港炒樓，但現屆政府自知日子唔多，唔做唔錯拖得就拖。阿莊認為，香港自由社會，好難話唔歡迎邊類投資者入場炒樓，更何況係祖國同胞？

到底市場炒作不離供需關係，政府宜更積極加快推出中小型住宅地皮，甚而推出措施搞活現成居屋嘅二手市場，讓真正有置業需要嘅香港人有渠道上車安居樂業，用家市場和炒家市場分流，就可以緩解影響大部分人嘅社會問題。至於同胞們，一個茶餅都可以炒出天價，人家有錢買心頭好就當睇花邊新聞一笑置之，用不着為此而將市場機制推向極端！

內銀有集資壓力

再睇番股票，值得一提嘅係內銀股，由於消息指銀監會正起草修訂《資本充足率管理辦法》，市場關注喺面對更嚴格嘅資本充足率要求下，內銀股可能再有集資需要，故見股價持續受壓，尋日工行（01398）同建行（00939）成交均逾30億元。

唔講唔知，擬再進行融資，金額可能達到600億元嘅招行（03968），上月底召開嘅股東會雖順利通過有關審議及批准發股嘅一般性授權議案，但反對票達到14.5%，反映股東們對公司頻頻大規模抽水，大幅攤薄每股權益嘅做法感到不滿。面對行業經營風險增加，監管當局做好本分亦都係無可厚非，反而，內銀股有必要着手改善收益結構，減少對貸款增長嘅依賴，免得嚇跑投資者。

此外，近期唔少二、三線股股價急挫過後，都反彈乏力，阿莊冇膽玩火中取栗，呢一刻冇入市撈底嘅意欲。反觀內地經濟唔使睇得太淡，部分中資股股價已回落至吸引嘅水平。但補充一句，呢期民企股陰陽怪氣，想沾手中資股，宜避開民企。

北京控股（00392）去年盈利中，有六成多來自管道燃氣業務，其餘來自污水處理、啤酒零售及高速公路業務，故可以用大半隻公用燃氣股來看待，特點係現金流高且收益基礎穩定。

燃氣業務有睇頭

北控股價由去年末季高位58元回落至近日低位38元，累跌達34%，RSI亦明顯見到背馳現象，相信股價表現已反映近年利潤增長趨向平穩嘅因素，現價今、明兩年預測市盈率已分別降至十四倍及十一倍，可重新吸引價值型投資者嘅目光。

戰報

東風集團（00489）

冼金基五月五日睇中嘅東風集團逆市靠穩，尋日高位見13.78元，以推介日低位12元計，累升近15%。

恒安國際（01044）

Sammi五月九日推介嘅恒安表現硬淨，當日低位62.85元，尋日高位70.5元，累計仍錄得超過12%升幅。