陸庭龍打保齡拍住港隊

太子都唔係第一次講恒生（00011）好支持本地運動發展，原來恒生員工一樣係運動健將。恒生之前就舉行咗二○一一「恒生團隊盃」保齡球賽，該行私人銀行及信託服務主管陸庭龍（Alan）仲親身上陣，與香港保齡球隊代表胡兆康進行表演賽添。大家都知Alan對理財投資就非常叻，唔知打保齡又喺咪一樣咁醒呢？

二百人參賽恒生盃

喺表演賽度，Alan與胡兆康組成拍檔，同賽事嘅得獎球手切磋球技。太子聽老友講，胡兆康向Alan分享咗唔少心得，相信Alan嘅球技應該得益不少。打完表演賽後，Alan同胡兆康做頒獎嘉賓之餘，更同參加者打成一片，合照傾偈唔在講，更同大家一齊打掌印同簽名留念。

講番個賽事，總共吸引200位恒生嘅員工同家屬參加，大家嘅水平都相當接近，多次出現同分，需要重賽嘅情況。難怪Alan都話，主管與同事嘅默契相當好，得獎隊伍好有打保齡嘅熱誠。Alan透露，今次比賽嘅「戰衣」同啦啦隊服裝，喺由部門主管贊助。