Fundman睇市：富力地產等住執平貨

港股兩星期前，用五日時間由22,519點彈上23,708點，合共升1,189點，估唔到，再五日時間，又打回原形跌番1,101點，最多人會問嘅，係為咩要跌？睇港元拆息變動唔大，三個月息口如老僧入定企在0.26厘經已近三個月，資金無流出迹象；至於今浪帶頭跌的A股，連日來都開始在2,700至2,750點形成支持位。

食晏時問起幾個基金交易員老友，異口同聲都話近排返工悶到瞓着，本來組合持倉經已唔多，但見人沽我沽，都搵outperformer開刀，只係稍稍提高現金比重，但對整個組合無關痛癢，聽完佢哋嘅意見，港股似乎陷入「聽日買平過今日」的惡性循環。尋日恒指最低見22,607點，同250日線22,598點距離僅9點，筆者向來唔信大市跌破250日線，等於判後市死刑咁嚴重，但一旦跌穿上次低位22,519點，過去幾日博反彈的全部都要做蟹！

史提芬最擔心係隨着美國QE2進入倒數階段，今次萬一好似過往幾次救市前，美股急跌逼政府就範就大件事，一於抱住「遲買平幾舊」心態，睇多兩三個星期，睇會唔會出現恐慌拋售，執吓平貨。

樓市勢必再起哄

今日焦點必定是賣地消息，個個睇住波老道地皮點樣成為新地王，尋日幾個在西半山及南區賣緊樓的地產商，打晒開口牌話有興趣到場舉吓牌。特區政府口就話定期賣一賣地增加供應，紓緩市場對供應短缺的疑慮，實質次次賣地，發展商都毫不吝嗇，輪流抬價舉手在所不惜，當作新盤宣傳，睇相佬呃你十年八年，今日之後中半山樓價肯定再水漲船高，低息加上低供應量，再配合港府對擴大公營房屋訴求恍如借咗聾耳陳對耳，不聞不問，惟有繼續睇中港兩地大款繼續炒爆香港真假豪宅。

講開地產，回顧近期內房股直到五月份的銷售數據，有中小型內房股表現有優於大型內房股之趨勢，未知是否靜市中，銷售策略上較具彈性有關。像富力（02777），五月份合約銷售22.82億元（人民幣．下同），銷售面積達約16.97萬平方米，兩者與去年同期比較，升82%和60%。可是，按五個月累積銷售108.62億元計，只及全年400億元目標的27%，情況的確令人有點擔心。

銷售達標難度高

繼一○年的協議銷售大升三成三之後，看來富力今年的目標訂得有點過分樂觀，以餘下七個月時間要完成目標推測，未來每個月要交出平均42億元銷售額，足足比四、五月份的26億元及22.82億元高出一大截，已買貨的，面前風險應該是管理層認衰調低銷售預測，或者大行調低盈利預測的可能性。

富力今年股價由11.1元（港元．下同）起步，最高升至12.54元，近幾個月中央限購令下，富力隨大部分內房偏軟，但跌幅唔算大，昨收10元，年初至今跌幅在一成左右，早前發行一四及一六年到期人民幣及美元債券，相信短期資金不成問題。其實富力現價已經幾平，預期市盈率不足六倍，市帳率接近○九年初低位，一一年講緊是1.19倍，但未有貨的，不妨等可能出現的不利消息入市，希望到時股價會抵上加抵。