股海實戰：零售股順勢炒一轉

伯老前晚發言未有提及推出QE3，加上對美國經濟的看法又係口淡淡，港股毫無反彈之力，恒指尋日收報22,661點，跌207點，成交681億元，沽空金額67.6億元，走勢較外圍市況還要差。

查實阿莊認為，依家港股估值已回落至一個較合理嘅水平，奈何金魚缸缺水情況尚未見改善，想攞錢走嘅人多過想買貨嘅人，結果當然係離不開金魚缸規律：愈貴愈多人搶，愈平愈冇人買。

賣地結果具指標性

大價股方面，大笨象（00005）依然無咩精神，股價失守80元。雖然今日政府拍賣半山波老道地皮，預期競投氣氛激烈，但未能提振地主股表現。恒地（00012）雖頻獲大股東入場增持，但股價仍然受壓，源源不絕嘅沽盤從何而來，耐人尋味；長實（00001）及新地（00016）則分別微跌0.5%及0.6%。

部分二、三線地主已表明會合組財團參與競投波老道地皮，但阿莊深信，大地主嘅競投取向更具指標性，而目前一個重要考慮係，若然呢幅地皮又拍個「天價」番嚟，分分鐘令樓價火上加油，迫使政府再出招為樓市降溫，但另一邊廂，半山地賣少見少，好貨難求！究竟大地主如何拆招，今日有好戲睇！

繼早前太陽能股現洗倉潮後，又有新一批中資股成基金沽貨對象，如四環醫藥（00460）、中國無線（02369）、中國玻璃（03300）、中傳動（00658）等。

好明顯，愈近月底半年結，基金繼續清理持倉，要錢唔要貨。阿莊亦聽聞缸邊傳聞指，有班老外大鱷睇準呢期北水難有大作為，所以精心部署要質低港股，見近期沽空比率持續高企，期指未平倉合約已達到9萬多張，鱷蹤有迹可尋。

提防大戶屠牛行動

再翻查資料，本月底到期嘅恒指牛熊證約110隻，其中50隻係牛仔，最多街貨嗰兩隻收回價分別喺22,100點及22,500點，而熊證街貨量則未成氣候，須提防本月有「屠牛」活動。尋日期指已失守250日線，若恒指跟隨跌穿250日線22,598點，下一個位要睇三月份低位22,123點。

現成股份唔少都有層層蟹貨壓頂，睇見都冇胃口，結果逼晒班炒家轉戰新股市場。Prada（01913）人氣唔錯，相信會有好表現，另傳聞城中最大嘅金飾珠寶零售商周大福，上市意向叫價係市盈率三十倍樓上，故見零售股表現強於大市。

有智慧不如趁勢，順勢留意零售股，其中I.T（00999）股價仍處強勢，經營數據交得出成績，7元邊可以關注一下，博叩五十二周高位8.22元，50日線支持喺6.35元；周生生（00116）估值落後於六福（00590），有炒落後條件；至於米蘭站（01150），經已收咗兩個禮拜貨，若然要翻炒，應該差唔多係時候，宜密切留意映期。

戰報

中國高精密（00591）

May於五月十六日推介嘅中國高精密逆市呈強，尋日高見6.36元，以當日低位5.8元計，累升近一成。

周生生（00116）

周生生尋日高見25.25元，Sammi早於五月十六日已經吼實，當日低位21.25元，累計錄得近19%升幅。