太子手記：新世界何太退休 難忘美孚

新世界發展（00017）係香港主要地產發展商之一，一向負責集團賣樓事務嘅新世界地產代理執行董事何伍燕榆短期內會榮休。何太同太子講，佢會喺今個月底後正式退休。原來何太畢業後嘅十年青春，就貢獻咗畀美孚新邨。

何太當年畢業後，就入咗美孚石油負責賣樓，經過約十年時間賣晒美孚新邨約1.1萬個單位，之後新世界買入美孚新邨商場等物業，何太就順住個勢加入新世界，不經不覺効力咗新世界已三十一年，縱橫地產界足足四十幾年。

退休在即 想學太極

何太雖然退休在即，尋日仍親自主持旗下大坑新盤命名儀式，仲即場吟詩講解樓盤名稱由來。太子亦趁機問吓何太多年來嘅難忘事，佢話美孚新邨係印象最深嘅樓盤，原因係成個盤由佢一手一腳負責，當年仲係全港首個賣樓花同設示範單位嘅新盤。而佢自己人生第一層樓，亦係美孚新邨一個面積500幾方呎嘅一房單位，當年以二手價6萬元買入，然後放租。

佢退休在即，何太除咗去旅行同幫手湊6個孫女之外，仲考慮學太極，所以退休後生活相信都會好忙。小道消息話，信置（00083）前聯席董事楊文，下周將加盟新世界接棒賣樓工作。