股海實戰：中國高精密展現強勢

內地端午加息傳聞落空，市場觀望五月份CPI數據，但似乎睇淡後市嘅力量正在增強，尋日港股沽空比率再逾一成，空軍積極部署，缸邊友人心惶惶。本月陸續有大型新股展開招股活動，唔多唔少影響現貨承接，要做好心理準備，港股可能再試上月低位。

國家統計局數字顯示，上月下旬內地食品價格持續上升，菜價及豬價升勢尤為顯著。喺通脹及加息陰霾籠罩之下，A股跟港股一樣「淡口」。雖然尋日滬、深均以接近全日高位收市，但交投並不配合，話A股見底，實在係言之尚早！

中國南車值得期待

早前阿莊加注嘅中國南車（01766）發出盈喜，預期今年上半年純利同比增長逾八成。以去年中期純利11億元人民幣計算，估計今年上半年純利超過19.8億元人民幣，即相等於去年度純利嘅八成，利潤處高增長期嘅睇法正確。

受盈喜的利好消息帶動，尋日南車股價曾高見7.84元，收報7.73元，逆市升3%，短期主要阻力喺50日及250日線匯集區8元關。

雖然今年次季南車純利同期增長低於首季增幅，但論金額，次季純利料仍高於首季，若第三季純利維持錄得按季增長，估值有上調空間，而公司喺新能源方面嘅發展進度亦值得期待，但當然，一個銀仔總有兩面，不明朗因素包括為應付業務擴張，下半年公司會否進行配股集資，且須密切留意來年定單增長步伐能否維持。

再睇吓近年被缸邊友譽為「長青樹」嘅建材股，官方訊息披露，目前全國保障房尚有七成未開工，下半年將進入開工高峰期，建材股可望長炒長有，若月內金魚缸真係再有BIG SALE，留意低吸相關股份的機會。

積極擴產迎接商機

內地「十二五」規劃另一焦點，乃繼續深化經濟改革，加快結構轉型，「物聯網」已列為重點項目之一。過去傳感訊號傳輸係透過有線進行，存在地域嘅限制，對大規模系統整合和即時監控帶來巨大障礙。喺構建「物聯網」嘅發展大方向下，無線傳輸嘅應用將成趨勢，加上重大設備「本土採購」已成為國策，中國高精密（00591）係較先進行無線傳輸研發嘅公司，亦可受惠「本土化」嘅政策取向，未來可望喺工業自動化質控系統方面一展所長。

近年公司積極擴大產能，位於福州嘅首期發展項目使用率早喺○八年已達到上限，而第二期項目去年已投產，今年全面投產後，公司產能料可翻一番，至於第三期項目則針對新產品「執行儀錶」，預計今年內落成，一三年前全面投產，正好迎合市場發展需要。

再睇股價走勢，尋日該股股價逆市以全日高位6.2元收市，升4.55%，成交1,398萬元，成功扭轉四月底以來嘅下降趨勢。留意若短線能以大成交衝穿6.4元，是浪可反覆向7元關推進，止蝕位訂於5.85元。

戰報

威高股份（01066）

May於五月二十三日睇中隻威高，當日低位只係9.99元，尋日升抵11.28元高位，跟到足可賺近13%。

東方表行（00398）

東表尋日高位見過5.13元，錢進五月二十三日推介時低位4.44元，跟佢上車走番轉，最多賺近16%。