紅輪作廢四叔變「減持」

「四叔增持不是新聞，四叔減持才是新聞。」一向眉精眼企嘅太子發現，四叔（恒地主席李兆基暱稱）申報六月一日減持恒地（00012）超過5,900萬股，以尋日收市價計，值成30億元！股權由63.3%大降番60%水平，真係大新聞。

不過，太子其實心裏有數，但都打畀恒地大公關Bonnie求證，問題果然係出喺已經變成廢紙嘅恒地紅利認股權證（紅輪）身上。

事關恒地批「紅輪」，未到期前全部計入四叔持股入面，所以一直係有「發水」情況。呢批紅輪因行使價高於市價，六月一日已到期作廢，涉及嘅股份亦告撇銷。

Bonnie解釋，四叔喺四月出100億元行使大部分紅輪轉為正股，剩餘未行使嘅就係呢5,908.5144萬股，紅輪撇銷之後，最新嘅持股至係四叔嘅「真身」。

現持恒地逾60%

四叔喺六月一日同二日，亦再喺市場買入250.2萬股恒地，涉資1.297億元，佢嘅最新恒地持股「真身」係14.28597億股，股權60.82%。而今次連串增持行動，其實已投入超過32億元啦。同時四叔亦報埋持有恒發（00097）約21.15275億股，佔權約69.41%。