股海實戰：長江基建穩健之選

美股打噴嚏，港股也着涼！前晚美國公布五月份ISM製造業指數降至逾年半最低水平，加上同月私人機構職位增長步伐大幅放慢，拖累道指急挫279點收場。港股亦隨美股下跌而大幅低開，之後一直喺低位徘徊，恒指全日波幅僅107點，收報23,253點，跌372點。成交縮減至640億元。

下周一內地與香港股市一樣，端午節假期休市一天。內地市場盛傳，端午節前後，人行可能再出手調高利率，皆因今年以來，央行係「一月一提準（存備率）、隔月一加息（對上兩次加息分別喺春節假及清明節假最後一天）」，故惹來下周一央行可能會加息嘅猜測。息魔纏繞下，尋日A股疲態未改，滬綜指險守2,700點收市。阿莊都係嗰句：做定加息心理準備，壞消息快快出盡，總好過繼續拖拖拉拉，不見天日！

阿莊呢兩日落金魚缸，發覺唔少缸邊友都「口淡淡」，更有投行朋友話，依家唔係要搵平貨買，而係要搵邊啲股票股價未跌嘅嚟沽。尋日大笨象（00005）話咁快跌番落80元，成交達到26億元，沽空額7.96億元。近期表現相對強嘅友邦（01299）話唔定會成為大戶追沽對象，向下要先試50日線25.5元支持。

受惠通脹預期升溫

市況飄搖，投資者避險意識強烈，尋日提及嘅領匯（00823）股價逆市反彈，收報26.4元，升2.52%。同樣屬穩陣之選嘅，有長江基建（01038），尋日股價重上50日線樓上，升0.81%，報37.5元。

德銀最近亦就長建發表研究報告，指喺全球通脹預期升溫之下，對喺多個國家經營公用事業嘅長建有利，而集團完成購併英國電網，亦有助帶動盈利增長。睇走勢，近日股價已回補五月上旬的下跌裂口位，走勢改善，成功上破39元阻力位嘅話，目標可上調至41元，止蝕位35.5元。

容許阿莊講吓題外話，講到全球通脹，能源價格高企不下係鐵一般嘅事實，中央政府為落實節能減排目標，已制訂政策扶持節能環保產業發展。除石油、天然氣、煤炭三大能源外，近年還確立開發煤層氣資源嘅方向，去年十一月底，商務部發出了四個煤層氣對外合作專營權牌照，產業布局漸成，而《煤層氣開發利用「十二五」規劃》更明確定出，煤層氣產量目標將達200至240億立方米。

所謂「煤層氣」，乃指在煤層中嘅一種非常規天然氣，有着熱值高、無污染新能源嘅特性，往往是引發煤礦爆炸的主因，過去因沒有規範發展，白白燒掉排空，如今有政策支持加快開發成四大能源之一，當可叫人另眼相看。

捕捉煤層氣受惠股

雖然目前香港上市公司參與開發內地煤層氣項目僅處於初階，但隨着產業政策明朗化、更多優惠政策出台，相信不難吸引外資大行嘅目光，嚟緊邊隻股可以率先喺呢個新領域實現盈利，就可飲到頭啖湯！

戰報

合動能源

（00578）

錢進五月十八日睇中嘅合動能源表現堅挺，尋日高位見0.8元，以推介日低位0.71元計，賺近13%。

申洲國際

（02313）

申洲尋日高見10.86元，May上周四已經吼實，跟佢於當日低位9.74元上車，又賺超過11%。