韋奕禮無緣親自交棒

證監會行政總裁韋奕禮下周三（六月八日）就Last Day，佢已約咗一大班傳媒下周三談心，講吓嚟咗香港六年嘅感受。大家最關心的，係下周三或之前，政府會唔會公布證監會CEO繼任人呢？

太子聽聞，政府未必會喺韋奕禮離任之前就公布新CEO人選，但冇理由一個咁重要監管機構會出現阿頭真空o架？因此估計當日亦會有所公布，好明顯，會係公布署理CEO嘅安排。咁邊個會做署理CEO？論資排輩，副行政總裁張灼華機會最高。

聘新CEO到最後階段

咁係咪代表張灼華已無緣問鼎CEO，真係要考吓大家IQ了。不過，近日市場傳聞下任CEO都係以老外佔上風，一時傳話澳洲人係大熱，一時又話歐洲人。

不過，政府暫未公布新CEO人選住，未必代表仍未找到合適人選，有消息話其實遴選委員會搵繼任人好順利，依家已進入程序階段，大家都知，做得證監會高層，肯定要通過品格審查，俗稱「查三代」，過程梗係需要一些時間呢。再者，人家可能本身有工作，都要有安排o架，大家都係耐心等公布啦。