Fundman睇市：華潤置地屆入貨時機

內地五月份採購經理指數，由四月的52.9下滑至52，乃自去年八月份的51.7以來最低，人行緊縮政策令內地經濟繼續放緩，不過在內地通脹出現見頂回落迹象前，中央在經濟增長與價格穩定兩者之間如何取捨，大家是心知肚明。

前日急升近500點後，大市似乎需要抖抖氣，恒指尋日高低波幅得108點，埋單跌57點，報23,626點。過去大半年，指數在22,519至24,988點之間玩回力球，中間價23,753點，同現時指數相差無幾，短期後市會點？筆者傾向係上落市格局居多，主要係六及七月，內地通脹數字高於預期機會仲係較大。

上海同業拆息近日成為內地資金緊鬆的寒暑表，人民幣隔夜拆息昨回落至3.14厘，雖然仲係比五月中的2.1厘起步位高，可是人行暫緩發三年期央票，對紓緩資金效果立竿見影。

人民幣兌美元匯價長升長有，執筆時見6.4779，又是匯改後新高，可是一年期人民幣不交收合約，同五月初的6.3005高位有段距離，報6.3568，反映市場預期人民幣一年後升值1.86%，比上月初2.9%低，或多或少意味着中國經濟硬着陸風險，唔單止股市係咁睇，連需要匯率對沖的出口商，都有同樣睇法。

全年銷售可望達標

內房股威過一陣，近期又靜番晒。華潤置地（01109）首五個月合約銷售94億元（人民幣．下同），連同32億元認購額，合計126億元，同去年上半年的73億元比較，增長唔少，但如果同公司自訂的全年目標300億元一拼埋，僅及四成二，不過管理層認為，隨着下半年推出新盤數目較多，仍有信心全年達標。

近期幾間內房股銷售數據，都顯示銷售會先快後緩，首四五個月已完成半年計劃，主要係怕下半年限購令威力浮現，銷售會比上半年慢，故潤地的情況，的確比較特別。如果以首五個月每月平均25.2億元計，全年銷售302.4億元，只僅僅高過300億元的目標。

記得○八年金融海嘯，市場對內房股前途睇得淡過水，最悲觀甚至估三分一內房會因為資金周轉不靈而倒閉，當時內房股發的債券形同垃圾，部分息口去到40甚至90厘。時移世易，今時今日中央唔准樓價升得太快，辣招出完一招又一招，有趣的是，今趟內房股債息卻反而愈做愈低，像潤地一六年期債券，息率最近由4.9厘去到4.73厘；雅居樂（03383）一七年期債券，亦由三月中的9.7厘，輾轉去到昨日的8厘左右。

內房前景備受看好

傳統經驗話，債券二手市場較唔活躍，很多時要有持至到期的打算，因此投資者對於公司的償債能力及財政狀況，都會更深思熟慮，債價上升債息向下，反映在中央打擊樓市炒風下，債券投資者對內房的長遠睇法更正面。

大行預測潤地全年銷售額及純利分別為312.1億元及54.21億元，市盈率13.1倍，○八年至今估值介乎13至29.8倍，目前處於近年下限水平，中長線睇好內房，亦不嫌短期股價比較沉悶的話，目前無疑是理想的入市時機，如果要在潤地之外，再加添1隻高BETA內房股在投資組合中，筆者會選恒大（03333）及雅居樂。