股海實戰： 達芙妮留意上車機會

港股前日急升過後，尋日進行整固，恒指全日波幅僅108點，收報23,626點，跌57點，成交738億元。扣除金沙中國（01928）配股上板逾23億元，成交仍較期指結算前嘅低迷情況有所改善。此刻缸邊友嘅願望係金魚缸六月不絕，七月大翻身！

願望歸願望，能否實現，十分視乎今次內地宏觀調控嘅成效。近期內地多個地區出現旱情，加上食品安全事件餘波未了，或多或少會拖長通脹尋頂嘅時間。

近日內地市場已開始拋出六月「三率齊動」嘅說法，即會一併調高存款準備金率、利率及匯率。正所謂「長痛不如短痛」，若然數據顯示真係有咁嘅政策需要，阿莊寧願快成其事，反有助撥開雲霧，最怕係小病拖拖吓變成大病，咁就仲難搞！

即將進入炎炎夏日，又係空調嘅銷售旺季，實施兩年嘅節能定頻空調補貼機制已於尋日完結，有消息指短期內空調價格或會上調一成左右，故見全國第三大空調生產商的志高（00449），尋日股價呈異動，收報0.85元，升3.66%，短炒策略係，若受阻於0.9元，可候回試0.8元邊支持再進場，升近0.9元獲利，下穿0.75元止蝕。

領匯（00823）剛宣布截至今年三月底止年度可分派收入24.58億元，增長15%，每單位派息57.59仙。基於業務模式的特點，領匯相對其他地產股的風險較低，股息回報率穩定，睇好租金上升趨勢，領匯係一個可攻可守嘅選擇。

零售股繼續尋頂

另一方面，本港四月份臨時零售業總銷貨價值按年上升27.7%，較首季的21%增幅為佳，亦高於市場預期嘅25.2%，消息刺激零售股股價繼續尋頂，金飾股六福（00590）再創新高、謝瑞麟（00417）震倉完畢大升逾9%；服裝股I.T（00999）升4.35%，威高（01173）升逾9%。

鞋履股達芙妮（00210）亦有睇頭，尋日股價曾高見7.89元，收報7.85元，升4.95%，成交大增至1.26億元，不但突破近半個月的阻力位，更一口氣踼穿250日線7.65元，確令人眼前一亮！

截至去年底，「達芙妮」品牌於內地設有3,789個銷售點，其中有一成處於一線城市，其餘分別喺二至六線城市，食正農村消費增長以及城市化所帶來嘅商機。今年，公司擬就其核心品牌業務開設800個銷售點，當中包括600個直營銷售點及200個加盟零售點。

業務整合見成效

至於去年初收購品牌「富珍」後，去年末季開始進行業務整合，料於今年全面發揮成效。目前該股股價尚處於四月初以來嘅上升通道，短線若受阻於8.2元，可待回試7.5至7.6元水平留意上車機會，以一一年預測市盈率十八倍計，目標價可定喺9.2元，上升通道支持喺6.8至6.9元。

戰報

景福

（00280）

Sammi上周三推介景福，又畀佢貼中，尋日高見2.39元，於推介日低位2.06元上車，短炒又賺16%。

I.T

（00999）

I.T尋日再升至高位7.73元，錢進上周三已經吼實，於當日低位6.27元上車，賺超過23%。