股海實戰：中煤有條件追落後

今年「五窮」好不容易成為過去，就喺五月最後一個交易日，港股終於一洗頹風，恒指現大陽燭，並一度重上23,700點樓上，收報23,684點，升499點或2.16%，成交大增至904億元，表現令人眼前一亮！

誠如尋日阿莊所言，由於大摩中國指數新貴股價表現已作反映，雖然尋日成交確有增加，但大部分股價未有異樣。粗略估計八隻新貴加三隻剔除股份總成交額約66億元，約佔大市成交7.3%，可見成交大增並非此單一因素使然。反觀，和黃（00013）炒分拆赫斯基上市嘅消息，刺激股價急升5%至90元收市，成交高達39.5億元，可謂功不可沒。

此外，尋日尾市明顯見到有買盤積極吸納內銀股，單係建行（00939）、工行（01398）、中行（03988）及農行（01288）四隻，成交合共達72億元，沽空未有異樣，可見真係堅BUY﹗事實上，前日上述四大內銀A股走勢省鏡，已有內地傳媒揣測可能係匯金增持護盤，咁啱尋日輪到內銀H股有異樣，若然真係國家隊出嚟護盤，將對當前中資股估值見底發出強烈訊息。

A股下跌空間有限

近日國務院發展研究中心金融研究所副所長巴曙松亦開腔指，以市場估值計，A股下跌空間不大。再睇近期十多家A股公司獲股東淨增持或提出回購方案，如中油、貴州茅台、大唐、上藥等，相信出發點都係對公司盈利前景有信心，且認為公司估值太便宜。

阿莊屈指一算，目前A股市值只有十六倍PE，接近歷史底部（十五倍），吸引長錢入市嘅條件已具備，問題係指數會喺底部橫行多久，就要視乎上升嘅催化劑何時出現。

尋日滬、深A股成交唔多，兩市主板成交僅1,300多億元人民幣。論整體市場氣氛，無論A股及港股均尚未有根本好轉，亦不排除短期會再次掉頭回落，何況港股已連續六個交易日高收，恒指累升近千點，短線回吐兩、三百點，喺50日線23,393點整固亦不足為奇。

即使有長錢開始入場執平貨，上落市可能會維持一段時間，待交投持續有明顯改善，指數確認突破大型上落區，兩地股市始會真正回春。

煤炭股尋日嘅表現亦值得一提，中國神華（01088）再提回購計劃，消息刺激股價創52周高位38.8元，收報38.65元，升3.2%；兗煤（01171）亦唔輸蝕，創新高32.95元，收報32.5元，升4.6%。

股價底部支持強勁

雖然中煤能源（01898）基本因素未及前二者，現價10.52元，距離五十二周高位15.08元甚遠，足以反映現實。

再睇走勢，近月中煤股價成功考驗過去兩年嘅底部支持（9至10元區域），若兩隻龍頭神華及兗煤股價繼續尋頂，中煤亦有條件追落後，先睇250日線11.55元，止蝕10元。

戰報

I.T（00999）

I.T尋日高見7.39元，May早於五月二十日已經吼中，跟佢於當日低位6.24元上車，最多賺逾18%。

合動能源（00578）

志強上周一睇中嘅合動能源受到追捧，尋日高位做0.79元，以推介日低位0.71元計，跟到足可賺逾11%。