股海實戰：TCL通訊超賣可撈底

近期內地「水緊」情況愈趨嚴重，引發A股及港股出現大型沽貨套現潮，滬綜指由上月高位3,067點回落至上周五低位2,708點，累計跌幅11.7%，已連續五個交易日喺250日線樓下收市，RSI已回落至極度超賣嘅水平。不過，有銀嘅人寧可攞啲錢去放貸賺取高利息，結果A股Big Sale都無人吼，呢個現象確實令人感到無奈！

上周市場傳來中石油（00857）A股獲母公司增持，乃是自○八年增持後，另一次的增持行動，一般理解為中石油A股估值過低，故母公司遂以銀彈入市予以支持。今年次季A股市場大力去除「水分」，大型國企股份估值目前已回復至相對合理嘅水平，若然國家隊入市規模進一步擴大，相信對今次A股估值尋底進程有正面嘅啟示作用。

不過，阿莊都係嗰句，跌市無謂估底，特別係如今跌市由市場流通性變化以及經濟不明朗因素使然，加上禍不單行，繼肉價飆升後，近期內地多個地方出現旱情，農作物產量勢必受到影響，會否延長通脹尋頂時間，仍有待觀察。此刻股壇老手都覺迷茫，見步行步，即使想作長線吸納，惟有堅持信念，並採取分注入市策略，以盡量降低風險。

期指結算更添波動

港股方面，上周五恒指已一如所料回補了下跌裂口位，收市報23,118點，升217點，大市成交645億元。工行（01398）及建行（00939）成交增加，其次係兩隻油股，中石油及中海油（00883）分別升3.8%及2%，成交分別達18.1億及16.6億元。今日係五月份期指結算日，相信周初恒指繼續喺23,000點徘徊，稍後內地公布最新經濟數據前後市況或又再轉趨波動，股友宜注意風險。

華能新能源（00958）上市計劃捲土重來，由於已覓得多位大孖沙出任基礎投資者，加上今次公開招股部分規模有限，話唔定掛牌股價表現會有驚喜。咁啱上周國家能源局公布嘅數據顯示，首季內地風力發電量增長達60%，喺傳統發電業務長期受到成本高企困擾之下，再生能源嘅發展更值得期待。

上文提到中石油獲母公司增持，其實除咗國企股之外，亦見到其他股價跌得低殘嘅中資股開始獲母公司入場吸納，其中一隻係TCL通訊（02618），本月先後獲公司主席及母公司TCL集團入場增持。

事實上，受惠內地手機換機潮加快，以及智能手機嘅需求上升，今年首季TCL通訊純利同比增1.5倍至1.8億元，顯示業務發展良好。

估值已屆吸引水平

不過，TCL通訊嘅股價偏偏由今年二月高位9.47元反覆回落至上周五低位5.3元，累計調整幅度達44%，估值已回歸基本步，短線喺嚴重超賣引發嘅技術性反彈，以及母公司增持嘅利好消息支持下，且看能否喺5.5元水平喘定，反彈目標可以睇6.35元，5.3元則不宜有失。

戰報

英皇鐘錶珠寶（00887）

Sammi於二十日吼中嘅英皇鐘錶珠寶受追捧，上周五高見1.32元，以推介日低位1.2元計，賺一成。

東方表行（00398）

冼金基於十二日推介隻東表，當日低位只係4.18元，上周五最高炒上4.74元，跟到足可賺逾13%。