年輕人理財個案

阿彤：炒細價股賺外快

「我每月靠補習、做Sales同教興趣班，兼職賺到約2,500至3,000蚊，但消費同交通費平均都要3,000蚊，唔夠惟有用暑假剩落嘅積蓄囉！我都有玩吓股票o架，但只係短炒想搵吓快錢。所以都係買啲細價股，講真嗰句滙控（00005）嗰啲咁大隻，我連入場費都唔夠俾！」

她又說：「儲錢方面，我無定期儲蓄嘅習慣，但如果嗰個月兼職賺得多嘅話，我都會儲番啲嘅，下個月使凸咗咪拉上補下囉！之前都有朋友話買保險嘅，但好似月供金額都唔低，我每個月都唔知有幾錢收入，點買喎！」

Raymond：月使二千冇欠債

「我每個月靠阿爸畀2,000蚊零用錢作使費，但都夠用嘅！食飯搭車大概要用1,500至1,600蚊，剩低400零蚊就買吓嘢或者儲起佢！舊年補習儲落嘅錢，如果有需要嘅話，就要動用啦！」

他說：「雖然幾無保障，但我得咁少錢，無咩投資計劃啱。如果將呢啲錢都攞去買股票，咁我就真係乜都冇啦！好在我無借政府grant loan、無信用卡，所以唔會有負債！」

Leo：買儲蓄保由阿媽供

「我覺得理財真係好重要，所以一定要學好同做好，如果唔係一世都窮！但現實我連使都唔夠使，咁又點理財呢？每個月阿媽畀3,000蚊零用，三分二我會用嚟食飯，三分一用嚟買嘢，最後真係1蚊都無得剩！」

他又補充：「我梗係想賺多啲錢啦，但仲讀緊書，邊有時間去做嘢喎！阿媽就有幫我買儲蓄人壽保險，但都係佢供，詳情我都唔知！前幾年，阿媽買咗層樓，依家仲係佢供緊，但講到明話我一出嚟做嘢就要自己供番！理財，惟有遲啲再算。」