股海實戰：重農行跟基金買貨

美股前晚喘穩，港股亦順勢繼續收復失地，恒指尋日重上22,900點收市，升153點，但成交僅562億元，反映投資者對反彈市有保留，有貨嘅怕愈溝愈淡、冇貨嘅亦不急於入市買貨，大家都一於唔做唔錯。

恒指喺22,942至23,147點有一個下跌裂口，若短線外圍持續回穩，回補此裂口位亦不足為奇，但內地市場流動性緊絀問題得到解決前，仍要提防突如其來嘅沽貨提款潮再次出現。下周內地將公布最新經濟數據，不妨留意人行如何評論當前嘅經濟情況，以掌握政策最新走向。

內地中小企借錢難

事實上，最近商務部對溫州企業進行抽樣調查，結果顯示四分之一企業接近虧損，另亦有內地商界組織進行調查顯示，企業貸款困難已影響到很多中小企嘅正常運作，情況比○八年更糟云云。阿莊亦理解到長痛不如短痛嘅道理，中央收緊市場流動性，嚴防通脹及資產泡沫，實有其必要，過程帶來痛苦在所難免，但中途放棄必將帶來惡果，且看今年中央喺宏調政策上如何做到恰到好處，好能化險為夷。

一如所料新股王米蘭站（01150）股價繼續調整，尋日低位見2.23元，收報2.27元，跌9%。保利協鑫（03800）尚未止跌，尋日再跌逾半成；旭光（00067）曾經反彈，但最終亦僅平收。講開下跌股份，尋日超大（00682）股價急挫逾兩成，公司已作出澄清。阿莊無意評論事件，只係心裏再一次聯想起投資民企嘅風險，別有一番感受。

錯盤事件禍不單行

尋日上晝聽缸邊友提到兩宗懷疑烏龍交易，事緣中航信息（00696）2送1紅股及派發末期息均於尋日除淨，除淨價4.681元，誰知上晝市前「U」時段以5.5元成交咗26.3萬股，該股收報4.75元；另1隻係聯華（00980），10送8紅股連同末期息尋日除淨，除淨價18.714元，奇怪係上晝「U」時段有1手以32.95元成交，結果收報18.7元。係咪有人表錯情以為有平貨執，不得而知，但投資者買賣前實有責任先了解清楚公司情況，免招損失。

MSCI多個指數系列將於本月底收市後調整成分股，近日各新貴股價喺基金買盤承接下逆市走強，早前阿莊提及嘅中國建築（03311），尋日以全日高位8.3元收市，升2.47%；另四環醫藥（00460）曾高見5元，而中航科工（02357）亦升3.8%收市，相信喺正式落實之前，一眾新貴仍會繼續獲得基金買盤支持，派對仍可以開多三兩日。

有智慧不如趁勢，可以留意另1隻新貴股——重農行（03618），尋日收報5.49元，升0.55%，成交7,189萬元。近周跌市，該股喺10日線5.4元水平見到承接，底部支持上移，暫受阻於50日線5.5元，成功突破目標回補三月下旬嘅下跌裂口5.7至5.95元，止蝕位5.25元。

戰報

招金礦業（01818）

積奇周二推介嘅招金礦業，尋日高位見17.58元，跟佢於當日低位15.84元上車，短線賺近11%。

中航科工（02357）

May於十三日睇中嘅中航科工果然有料到，尋日曾高見5.23元，以推介日低位4.73元計，賺逾一成。