股海實戰：融資股時勢造英雄

周一急跌過後，港股昨日牛皮偏軟，成交縮減至524億元，顯見大市喘穩只係大戶暫時放軟手腳，觀乎五、六月期指成交超過七萬七千張，大有山雨欲來之感，期指結算前股海繼續風雲變色，一於擔定櫈仔等睇戲！

A股表現與港股類似，滬、深兩市主板成交僅1,500多億元人民幣。阿莊認為，今個五月，兩地金魚缸水分盡去，估值已回落至相對合理水平，但長錢仍觀望，尚未積極入市接貨，主要有兩大考慮。第一、中國宏調成效未明，持續從緊換來經濟增長顯著放緩，硬着陸風險增加；第二、美國QE2在下月底完結後，聯儲局仲有咩招數刺激經濟表現。兩大因素明朗後，股市自然撥開雲霧見青天！

食品股跑贏大市

下周內地將宣布最新通脹數據，預期五月份CPI會再創新高，料增幅超過5%，六月是否見頂仍屬未知數。食品價格堅挺，難怪一系列食品股股價跑贏大市，尋日青啤（00168）、康師傅（00322）、統一（00220）、旺旺（00151）、中國食品（00506）等均告高收，短線可以順勢留意銀基（00886）。

滙豐證券發表研究報告，預期恒地（00012）今年物業銷售收益大增，預測全年盈利增幅可達65%，故首次給予「增持」評級，目標價69元，即現價較之有逾三成上升空間。阿莊完全同意呢個睇法，會繼續持貨，只係遺憾冇喺高位走一轉。

北水短缺，最近阿莊亦聽聞有好多內地商家積極四出尋找融資渠道，皆因搵內地銀行尋求貸款經已行唔通，風頭火勢出售不動產套現唔容易，做廠嘅既要捱人民幣升值兼成本上漲，買料又下下現金交收，生意難做，資金周轉壓力可以想見。

內地商界對融資需求明顯增加，為專門做內地融資貸款服務嘅企業帶來商機，好似專門做典當貸款服務、委託貸款及其他有抵押品貸款等業務嘅中國信貸（08207），首季生意額5,000萬元人民幣，利潤卻達到2,800萬元人民幣，咁好利錢，難怪一隻創業板股，能吸引名牌基金入股。

另一家專做融資租賃相關金融服務嘅係遠東宏信（03360），近幾年純利複合年增長達到50%。聽講目前中國信貸與遠東宏信都計劃發人仔債券，一旦成功集資，又可以做多啲高息生意，利潤水漲船高，可見股價堅挺有因。中國信貸尋日見掛牌以來新高1.94元，收報1.9元，升13%；達東宏信升3.3%，報8.38元，雖然較大價，但勝在業務分布於六個主要基礎行業，風險較為分散，同樣值博。

金榜異動有鑊氣

若然想揀細價股，近日股價異動嘅金榜（00172）亦係專做內地融資服務，雖然話做內地中小企融資服務嘅風險可能較高，但高風險高回報，加上最近隻股開始有鑊氣，股價升穿0.5元後唔肯回頭，細細粒容易食，可以小注湊吓熱鬧，目標價睇0.65元，穿0.495元止蝕。

戰報

金榜集團（00172）

金榜愈升愈有，股價尋日再搶高至0.58元，跟Sammi即日於0.51元低位上車炒番轉，已賺近14%。

馬斯葛（00136）

錢進周一推介嘅馬斯葛繼續有追捧，以當日低位0.52元上車，至昨日0.58元高位食胡，最多賺逾11%。