太子手記：陳啟宗為「宮」為「私」齊齊平反

恒隆地產（00101）董事長陳啟宗一向快人快語，更加唔會將唔合理嘅嘢「啃」咗去，好似早排故宮內嘅建福宮淪為富豪獨享私人會所，恒隆畀人拉埋落水，佢尋日好主動澄清；又好似私募基金大行其道，佢又覺得坊間對私募基金理解錯誤，實行一次過「宮」「私」大平反。

建福宮已交回故宮

陳啟宗話，集團喺○五年已完成修建建福宮，○六年簽下管理協議，○八年合約結束後，已將其交回故宮管理。佢話集團從來只有興趣「搵大錢」，當年修建建福宮，已表明不會商業營運。言下之意，係要同呢單嘢劃清界線。

質疑私募基金譯名

對於近年相當流行嘅「Private Equity」，中文名稱譯作私募基金，陳啟宗認為譯法唔適當，佢講咗一個同凡人不同嘅解法。佢話「私募」畀人覺得私下募集資金嘅感覺，資金來源似是不可公開，事實上有關基金主要是投資於股權及範圍非公開形式，因此佢個人認為應譯作「股票基金」或「股權基金」較為妥當。

陳啟宗再反對多一樣嘢，就係反對禁止內地人喺香港置業，認為有關言論「不負責任」，香港經濟得以成功，主要由於香港維持自由開放市場，萬萬不能「禁」呀！近年樓價勒唔住，陳啟宗認為要解決問題唔難，只要政府大量推地就搞掂，但又唔可以盲目咁推。佢話政府嘅土地政策明顯失誤，政府應推出更多大眾化嘅上車盤地皮。