Fundman睇市：雅居樂估值可望上調

超購王米蘭站（01105）今日上市，2,100倍超購紅爆魚缸，一手中籤率計算只得1%，機會同中六合彩七獎「三個字」差唔多，傳聞暗盤價升四至五成！向來無抽獎命嘅筆者雖然無認購，但好有興趣搵招股書睇睇，皆因在個人遊興旺下，奢侈品市場確係潛力非凡，早前筆者歐遊，見到唔少名店手袋早被同胞掃清，女士們要買名牌手袋，可能去米蘭站仲好過真係去米蘭。但係，股神巴菲特講過，最好的公司，是即使換隻猴子上場領導，也可如常運作，意思係管理層或者員工對公司影響力仲係愈低愈好，免得有挖角潮出現，或者其他對手模仿，有樹倒猢猻散的一日。

米蘭站主攻全新及二手高級手袋買賣，能夠分辨真假、免得入錯貨的「專業買手」團隊，毫無疑問是公司最貴重資產，年報顯示過去三年，培訓熟練辨別假冒產品僱員人數，合共27個，話少唔少，但未來要加快內地分店發展，培訓有經驗兼具誠信員工的進度能否跟得上？是筆者一個考慮，尤其在假貨充斥的內地，員工好壞肯定同採購成本及註銷產品率有直接關係！（過去三年註銷率是低得驚人），以股論股，1.67元上市，按暗盤升五成，去到2.5元，往績市盈率三十倍，或者短期成堆高級消費品及周大福都排住隊上市，可以趁勢再炒高些少，但公司歷史有限，這營運模式在大規模擴展後的成果有待考驗，要長揸似乎唔係筆者杯茶。

外圍因素利淡港股

上星期五，港股水盡鵝飛，總成交縮到唔夠600億，連大賭場期指，五月合約都係得5萬張交投。本來恒指收23,199點，乃三個半星期以來首次企在10日線（周五在23,137點）樓上收市，無奈周五道指又掉頭插93點收市，加上希臘債務評級被降，「歐豬」問題沒完沒了，困擾金融市場，擔心得來不易的死貓彈，今日又會被淡友一鋪清袋，23,000點關能否守住，會係相當關鍵。

內房股靜靜起革命，恒大（03333）剛創上市後新高，內地統計顯示，全國樓價升幅較去年底、今年初明顯放緩，成交也遠遠低於高峰期，唔少大行預測，六七月份中央再推多一次針對二三線城市的房產調控政策之後，今趟房產調控措施會暫告一段落，靜候政策發揮效用，股市春江鴨開始部署，靜靜累積內房股倉底。

銷售目標不難達成

三月中推介過的雅居樂（03383），至今累積升近兩成八，公司剛公布首季度物業銷售115億元（人民幣．下同），按年大升53%，相當於全年銷售目標370億元的31%，進度理想，但管理層也承認，中央出撒手鐧限購令之後，內地整體物業銷售量明顯回落，看來一如其他內房股，所訂的銷售目標，已預期先旺後淡，較大筆銷售額在上半年產生。

由過去經驗，內房企業幾乎都能夠有多無少的達到銷售目標，但觀乎分析員，目前預測卻是流於保守，綜合預測雅居樂全年銷售僅258億元，以首三個月已完成全年四成五預測，除非第三、四季真的淡到不成，否則分析員絕對有修訂全年預測的需要。況且，以保守假設市盈率只係8.3倍，估值是頗吸引。短期走勢的關鍵在於公司準備為下半年到期的2億美元融資再籌發銀團貸款，因可從中看到在人行不斷抽緊銀根下，對內房企業借貸成本的影響到底有多大，假如條件優於早前發的8.875厘票據，估計屆時股價有條件挑戰14至15元。