股海實戰：華創有力擺脫下降軌

有「水」萬事皆通，冇「水」會點？睇最近兩地金魚缸表現便可見一斑！

股市如海浪，漲退有時，投資者致勝之道在於學懂知所進退。好似呢啲市況，保留實力係最重要。若然估計無誤，下月底前內地水緊情況會轉趨嚴峻，部分股價累積可觀升幅嘅新興產業股，被洗倉情況會持續出現。

內地話推國際板，講咗咁耐都未見實行。上周內地財金官員口風似乎變得樂觀，指如今距離推國際板之日愈來愈近。一般預期大笨象（00005）和中移（00941）會成首批登陸國際板嘅港股。內地存款率較高，非存戶貪圖利息，只係資金苦無出路。好似呢幾年內地投資者買A股新股，接晒火棒，見到都怕怕。若有呢類國際級企業赴內地掛牌，相信會有唔少捧場客，呢個因素亦可能成為上述2隻巨無霸股價回春嘅轉捩點。

講到IPO，上周五上海醫藥（02607）掛牌，收報23元，與招股價平水，印證阿莊話呢隻股先A後H，H股炒極有個譜，更何況呢期A股唔好得去邊，咁嘅表現應該算係意料之內。

至於今日股市焦點，當然係新股王米蘭站（01150），執筆時已見到暗盤價升近五成，當真厲害。另一個名牌包包股新成員Prada亦即將啟動路演，屆時米蘭站又有影子概念，難怪聽唔少股友話，若然今日中段該股的升幅收窄至兩、三成，會考慮追貨短炒。

中芯季績欠理想

中芯（00981）宣布季績差強人意，且料次季收入減少3至7%，當堂震散股價，低位見0.67元，收報0.7元，跌10%，成交5.28億元，被人話講風涼話都要講句：好在走得快好世界！本來打算季績對辦會睇位入貨，點知季績咁嘅款，暫宜以靜制動。

信義玻璃（00868）上周五傳來批盪消息，股價跌6.7%，至8.39元收市，成交高達17.6億元。由於呢期太陽能股遭洗倉，公司分拆太陽能業務嘅計劃添變數，故改以先行批盪嘅做法可予理解，更難得嘅係有基金肯喺呢啲價位接貨，顯見對管理層的信心十足。

提到玻璃股，發改委數字顯示，四月份平板玻璃庫存按年增加38%，消息令玻璃股受壓。除咗信義之外，中國玻璃（03300）及洛陽玻璃（01108）分別跌3.8%及8.7%。呢個現象提醒阿莊，未來一、兩個月可能會有更多迹象顯示內地經濟增長放緩，涉及工業生產及內需嘅股份，表現或會較為波動，宜注意相關風險。

業務勝在多元化

新興概念板塊遇着「水退」，惟有將目光重投傳統實力股。華創（00291）勝在業務夠多元化，最近公布首季業績撇除特殊項目因素增15%，四平八穩。上周五股價以大成交重上10日、50日及250日線。若短線企穩31元樓上，可望扭轉自上月中旬嘅下降軌趨勢，再上試33.5元阻力位，向下支持喺29.6元。

戰報

中國油氣

（00702）

中國油氣上周五高位做0.51元，錢進五月九日推介時低位只係0.43元，跟佢上車走番轉，可賺逾18%。

達芙妮

（00210）

May上周二推介達芙妮，當日低位6.78元，其後續有追捧，周五高見7.5元，跟到足賺超過一成。