短炒倉：新天綠色買得過

志強二月份時曾推介新天綠色（00956），當日股價在2元水平，之後表現對辦，昨日收報2.62元，較當日累升達三成。股價升勢強勁當然有原因，因期間集團先後公布的一○年度全年及今年首季業績，均錄得理想表現，去年全年盈利增長68%，至2.79億元（人民幣．下同），而今年首季純利1.33億元，更按年升1.66倍。再睇埋過去四個年度，集團盈利一直持續大幅增長，由○七年的2,547萬元，增至去年的2.79億元，複合年增長率高達120%，表現相當驚人，絕非一啲一上市業績就走樣嘅新股可比。

MSCI新寵身價提升

集團從事燃氣及風電業務，屬國策受惠股。雖然由低位累升幅度唔細，但其實去年十月上市時，其招股價係2.66元（港元．下同），亦即係話現價仲爭少少至上番水面。

集團去年每股盈利0.146元，現價市盈率十八倍，而根據其業績表現，今年全年盈利翻一番亦唔出奇，即預測市盈率得九倍，實在超值，日前更被納入MSCI中國小型股指數，身價可望進一步提升，以十二倍的極保守標準，股價都已經可見3.5元，止蝕2.4元。

新天綠色（00956）

目標價：3.5元 止蝕價：2.4元