股海實戰：中國建築短線投機跟進

未到暑假，但金魚缸經已好有暑假Feel。尋日恒指繼續溫和反彈，收報23,163點，升152點，成交634億元。

內地四月份新增外匯佔款按月下降24%，加上近次存款準備金率上調、財政存款季節性增加、日均貸存備考審核等因素，都令短期資金面變得更加緊張，呢個「五窮六絕」真係唔講得笑！最近開始有分析指，內地經濟增長將會持續放緩，「硬着陸」嘅風險愈來愈高。

內地經濟風險上升

對此，國家信息中心亦承認，預期未來數月內地經濟增速將持續放緩，但就否定「硬着陸」之論。阿莊就認為，應對通脹，宏觀政策從緊確實有其必要，而對投資者嚟講，調整既然係無可避免，最好係快而徹底，拖拖拉拉仲死多幾錢重，惟有將希望放喺下半年。

回說港股，李超人今年首次增持長實（00001），刺激長實股價升2.68%，整體地產股氣氛亦有改善。不過，特首曾蔭權提醒市民，加息周期將近，買樓要量力而為。

查實即使加息周期重啟，初期亦只會溫和有序，更何況以目前美國嘅經濟情況，確實要到幾時先至有加息條件，相信連伯老都唔敢講。依家香港市民唔係驚息升，而係見樓價急升，要攞三成首期出嚟上會都唔容易，可惜政府擺明高樓價政策不變，對解決小市民上樓困境嘅姿態係愛莫能助，港人只有自求多福！

港鐵股東笑逐顏開

講開地產，港鐵（00066）獲政府給予黃竹坑邨及山谷邨一期兩塊貴重地皮嘅物業發展權，作為南港島線及觀塘延線工程嘅財政補貼。

心水清嘅都知道呢兩塊地皮好值錢，他日發展收益必遠高於鐵路建造成本差額。雖則話，政府亦係港鐵嘅大股東，利益左手交右手，但事實係港鐵經已上市，有公眾股東，故做法難免受批評。

站喺投資股票角度睇，呢次小股東（包括阿莊）真係掩住半邊嘴笑，尋日港鐵股價升1.07%，收報28.35元。與其揸股價江河日下嘅中移（00941），港人熟悉嘅港鐵似乎更顯吸引力！

講開組合持股，手持嘅中航科工（02357）近日有異動，尋日曾高見5.21元，收報5元，跌0.2%。由於下月起該股將成為MSCI環球標準指數系列之中國指數成分股，相信基金買盤持續有來，若然再回啲，可以睇位坐順風車。

另1隻新貴係中國建築（03311），尋日早段股價見過五十二周即市新高8.43元，午後曾回落至8.07元，收報8.26元，升0.73%，成交1.22億元，波動背後不難發現大戶吸納嘅手影。其實喺保障房概念支持下，此股估值唔貴，加上近因又有與MSCI指數系列變動相關嘅買盤支持，可以話叫好又叫座，月底前可以湊吓熱鬧，小注投機性操作，上望8.8元，下穿7.9元止蝕。

戰報

東方電氣

（01072）

積奇本月五日推介東方電氣，尋日高位見31.6元，跟佢於當日低位28.4元上車，已賺逾11%。

維達國際

（03331）

維達近日持續向上，尋日一度高見9.33元，較錢進上周一推介時低位8.4元，累計上升逾11%。