鄭海泉為妻兒多謝滙豐
香港華人大班傳奇鄭海泉（Vincent）退休在即，尋日佢就最後一次以滙控（00005）執行董事身份出席香港嘅非正式股東大會，話晒做咗三十三年，真係好唔捨得，但難得Vincent尋日仲不忘發揮幽默本色，多謝滙豐畀機會佢喺金融界學咗好多嘢，仲話喺滙豐做，令佢可「養妻活兒」。
退休後續任顧問
Vincent話離開滙豐係唔容易嘅決定，不過，好榮幸可以喺滙豐服務三十三年。滙控行政總裁歐智華就話，Vincent唔係完全離開，之後都會擔任顧問角色，特別喺亞太區事務，相信會提供唔少意見；Vincent大讚滙控嘅「戰友」，話對新管理層好有信心。
Vincent退下後，滙控嘅華人色彩好似減退不少，歐智華話滙控有好多出色嘅華人管理層，例如王冬勝、黃碧娟、恒生行政總裁梁高美懿等。