股海實戰：電力股轉運華能有得諗

內地股市持續回穩，淡友攻勢稍作收斂，港股反彈上23,000點邊收市，但成交僅608億元，反映投資者入市意欲低迷。喺現貨交投持續不振之下，期指市場容易主導現貨走勢，故愈近月底期指結算，要有心理準備大市波幅可能會再度擴大，缸邊友宜緊握扶手！

市建局近日落實馬頭圍道重建項目，引來「呎價萬蚊收樓」嘅講法，但其實九千幾蚊嘅出價係用實用面積來計算。若果新樓實用率有七成，即係話實際建築面積呎價約七千蚊左右，市區七年樓齡市價係咁上下，所以並唔係坊間所講，出價高到好似派錢做善事！

太陽能股宜迴避

今趟市建局出價，料可帶動區內需求及交投，恒地（00012）喺該重建項目鄰近亦有一個大型舊樓重建項目，收購實用呎價只係五、六千蚊，如今項目升值，估計發展利潤甚豐；另新地（00016）喺附近亦有一新盤將會開售，可坐享其成！

呢期太陽能股大幅波動，尋日上晝見保利協鑫（03800）試圖反彈，但唔成氣候，結果回落至4.56元收市，跌2.15%；緊接嘅殺倉對象係鉑陽太陽能（00566），股價挫9%，收報0.455元，成交3.55億元。股價大跌、反彈無力、成交放量，呢啲都係唔尋常現象，實不宜沾手。

呢排市況淡靜，阿莊都係同缸邊友打牙骹居多，最近就聽聞大鱷索羅斯喺商品市場興風作浪，一班瘋狂炒銀嘅溫州炒家就因此而損手爛腳，由於呢班炒家亦活躍於股市，今次炒燶商品，即使短期A股反彈，少咗佢哋參與，氣氛亦要打折咁話。

另一則缸邊秘聞，係表叔線人報料，某一隻早前曾經因高層出事而停牌，如今已復牌嘅能源公用股，事件發展仲有下文，主要係涉及更高層次嘅利益問題，呢鋪紙包唔住火嘅話，消息會相當震撼，所以叮囑阿莊，金魚缸咁多股票好揀，無謂偏偏要揀隻爛燈盞，一旦再拉閘真係冇人可憐，聽落又有其道理。

電價上調有支持

內地電力股近期表現略有起色，皆因內地鬧電荒，促使電價上調，以免「斷電」。繼四月份山西、河南等十多個省上調上網電價之後，近日盛傳發改委擬補充上調江西、湖南、貴州三省火電上網電價，以緩解電廠經營壓力，若消息屬實，料對電力股板塊起支持作用。

講開電力股，華能新能源早前擬進行IPO，可惜遇上市況逆轉，公司不急於減價求售，所以暫緩上市計劃。至於同期籌備IPO，且如期掛牌嘅大唐新能源（01798），掛牌後股價一度較招股價低兩成，近日終於重上水面。

聽講呢期IPO轉熱，華能新能源正密鑼緊鼓讓新能源業務上市計劃捲土重來，若今鋪順利重啟，相信同系嘅華能（00902）可受惠利好氣氛，且看股價能否喺一眾電力股中突圍！

戰報

百營環球資源（00761）

錢進上周四推介嘅百營環球資源，尋日搶高至0.167元，以推介日低位0.139元上車，賺逾兩成。

志高控股（00449）

志強上周一睇中嘅志高繼續有得炒，於當日低位0.78元上車，至尋日高位0.88元食胡，賺近13%。