股海實戰：中海石化行業實力之選

金魚缸冇晒鑊氣，散戶去晒煲新股。米蘭站（01150）全城HIT爆，超額倍數破開埠紀錄，真係天時、地利、人和，缺一不可！部分不敵魚缸悶場嘅炒友，索性開盤賭米蘭站首日掛牌升幅，相信正式登場定必熱炒！

講開新股，喺內地專做幕牆嘅遠大中國（02789）首日掛牌，收報1.66元，較招股價升10.6%，總算係識時務結善果。今日掛牌嘅鉦皓（08132）晒士唔多啱炒家胃口，加上全額配售，睇睇可唔可以炒番轉！

中芯留意收集機會

呢期指數陰陰落，唔少炒股唔聲唔聲冇晒影，一個唔留神隨時輸鑊甘。好似隻旭光（00067），四月初由2.8元炒上4.52元，上周大好形勢突然生變，掟到落尋日低位見3.55元，真係未必個個都走得切！

股價同樣高處不勝寒嘅，仲有保利協鑫（03800），上周見高位5.72元後反覆回落，尋日更似被洗倉，急挫7.9%至4.66元收市，成交高達15.3億元。

另一炒股中芯（00981）亦如期調整，最低質到落0.8元，收報0.82元，跌7.8%，成交8.94億元。阿莊日前經已袋袋平安，呢鋪淡淡定有錢剩，按計劃喺十九日季績前後留意分注收集機會。

富士康（02038）自被踢出恒指後，股價不斷尋底，尋日失守4元關，低位見3.85元，真係一沉百踩！MSCI環球標準指數及小型股指數兩個系列嘅中國指數成分股亦有變，前者新貴包括中航科工（02357）、銀泰（01833）及四環（00460），尋日股價均逆市高收，月底前不妨跟住指數新貴名單尋寶。

呢期中港兩地股市病因都在「缺水」，傳統股票幾好都好，只宜用炒上落嘅心態看待，一味死揸反而難過日子。今年以來化肥股中海石化（03983）股價一直喺6至7元水平上落，周初成功考驗50日線承接後回升，短線有得諗。

化肥需求有增無減

中海石化主要產品包括尿素、磷肥及甲醇，今年重點係確保內蒙古聚甲醛裝置正式投產、爭取湖北大峪口化工磷肥擴產改造項目喺年底前竣工，以及推動黑龍江鶴崗煤製尿素項目及山西河曲煤製尿素項目建設。

喺預期今年內地經濟將保持穩定增長之下，預期市場對甲醇下游需求殷切，而替代能源嘅持續推廣，亦有助增加對甲醇嘅需求。

此外，喺穩定物價嘅大前提之下，今年中央將力保糧食供應穩定，強農惠農政策將為化肥市場帶來有力支持，故從基本面睇，中海石化係實力之選。

分屬中海石化同類股嘅中化肥（00297），近兩周股價走勢亦對辦，不過中化肥現價一一年PE逾二十倍，反觀中海石化一一年預測PE十五倍，無論係業務前景同估值，中海石化都係勝一籌，上車目標向7.2元推進，止蝕6.2元。

戰報

中國伽瑪（00164）

志強上周三吼中隻中國伽瑪，當日低位只係0.29元，於尋日高位0.32元食胡，賺超過一成。

中國財險（02328）

積奇上周五推介嘅財險，尋日一度高見11.5元，以推介日低位10.48元計，短短幾日都有近一成利潤。