美聯小股東搵董事出氣
美聯集團（01200）尋日股東會，太子以為會平靜度過，點知都有驚險鏡頭，喺重選五個董事嘅議案，就有兩人爭啲唔夠票。
張錦成重選 四成反對
呢兩位董事分別係美聯嘅開國功臣張錦成同埋葉潔儀，佢哋攞到嘅票數分別是56.42%同52.28%。換言之，有超過四成人反對佢哋返回董事局。
據接近消息人士所講，今次投票嘅結果並非針對張、葉兩人，而係小股東同基金都想帶出一個訊息，投資者想間公司做好啲。睇番美聯嘅股價由最高九個幾，跌到依家五個幾，即係話股東嘅資產冇咗40%以上，投資者有意見係好正常。
張、葉係主席黃建業嘅直系親信，尤其張錦成幫手打下美聯嘅江山，雖然中間離開過去自立門戶，但近年返嚟幫公司重整業務，可謂對舊僱主有情有義。股東們今次對佢哋投咁多反對票，其實都算用心良苦，希望主席同一眾高級管理層接收到呢個訴求，努力做番起個業績同股價，咁就大家開心啦。
美聯開國功臣張錦成，遭超過四成票數反對佢重入董事局。（資料圖片）