短炒倉：維達一浪高於一浪

經過上周五的低開高收，本來諗住個市可以轉強勢，但尋日連23,000點都穿埋，唔多對路。內需食品股在尋日的跌市中表現硬淨，兩隻紙巾股恒安（01044）同維達（03331）都逆市升逾2%。

受佔生產成本達六成的木漿價格急升影響，維達去年盈利倒退7%，加上中央「限價」的陰影，令股價自去年第四季高位累跌最多近四成。不過，隨着集團調整產品結構，提升高毛利產品比重，有助抵銷成本上漲壓力，而內地紙品市場勝在深度夠，據媒體引述維達CEO張東方表示，內地衞生紙市場總值高達500億元，但滲透率只有30到40%，嬰兒紙尿褲市場的滲透度僅30%。換言之，集團可透過擴大市場佔有率，及拓展紙尿褲等高毛利產品，以維持盈利增長動力。

短線爆發力勝一籌

以市值計，維達只係恒安嘅十分之一左右，而維達往績市盈率二十二倍，恒安則達三十三倍，到底係恒安貴定係維達平，見仁見智，但論短線爆發力，個人相信維達會更勝一籌。股價自二月見底以來，維持一浪高於一浪的走勢，若能突破年初高位9.16元，預期會有一段急勁升勢，目標睇10.2元，止蝕8.2元。

維達（03331）

目標價：10.2元　止蝕價：8.2元