Fundman睇市：康師傅股價準備起飛

上星期五大挾倉，原來只係曇花一現，港股市底依然弱過藥煲，最吊詭嘅仲係國基會正忙於處理希臘債務危機，總裁卡恩又會忽然鹹濕，搞到捲入性侵犯案被捕，歐債危機令股市氣氛立即冷了一截。今年各類資產價格都有進帳，但經過尋日一跌，今年港股經已係負回報（未計股息），唔知幾時大家至可捱過22,000至25,000點嘅漫長黑暗上落市。

港股全日空，早市低開後全日反彈乏力，但總成交僅僅過600億，反映唔少大戶睇唔通，情願靠邊站。現貨收市後，五月期指認真誇張，再隊多120點，收22,776點，比恒指低水184點，即使減番除息因素，仲要低水97點之多。有卜架老友話，近期唔少中小型對沖基金，見市況唔就，早在四月上旬在現貨市場全線減磅，僅留少量彈藥在衍生工具（包括期指）炒炒貢幫補吓。睇見期指近期日升日跌，忽高忽低（水）咁，來回隨時超過150點，淨賭期指的芬佬認真係藝高人膽大。

副食品股齊炒落後

今年三月，發改委聯絡一眾民企老總，要求擱置加價計劃，當時市場最大反應的要數康師傅（00322），公司在與當局聯繫過後，決定取消提高即食麵價格，消息令股價由20.85元急挫至18.34元，筆者當時建議看官們可以開始借市場悲觀情緒，收集副食品股，相信原材料價格升勢在第二至三季告終，這類股份會有相當大的炒落後空間。

近兩日，康師傅、旺旺（00151）及統一（00220）無論成交額及股價都見異動，一來小肥羊（00968）被Yum！睇中收歸己用，內地民生品牌惹人憧憬外，似乎是春江鴨已經開始行動，炒內地通脹快將見頂的故事。

康師傅剛公布的首季成績表有意外驚喜，受惠於飲品銷售錄得五成三強勁增長、即食麵去年底今年初各一次的加價，以及整體售價較高的產品結構上升，營業額較去年同期升40%，至20.33億美元，純利勁升20.4%至1.67億美元，毛利儘管如預期受壓，從一年前30.35%跌至26.67%，但和去年最後兩季（30.64%及18.96%）的平均數24.8%比較，似乎無進一步惡化趨勢，至少就比市場預期可能低於25%樓下來得溫和，反映康師傅轉嫁成本能力，其實係超出分析員預期。由近兩日大成交創新高的情況看來，新升浪唔使等原材料價格回落已經悄然展開。

大行調升估值在望

過去六年，康師傅預期市盈率介乎二十至四十六倍，四月初跌至最低22.8倍，其實已經相當吸引，綜合大行預測，一一年純利5.31億美元，每股盈利9.4美仙，市盈率30.1倍，估計首季業績會催化更多分析員稍稍向上修訂全年預測（美銀美林尋日就調高一一至一三年預測介乎1至4%），預期市盈率應該約二十九倍。

老實講，現價康師傅不是十分便宜，估值與五年平均的28.5倍水平十分接近，但基金押注在毛利率見底回升，相信短期有潛力獲得更高估值水平，假如去到○九年及一○年高位三十七至三十八倍，股價可見28元樓上，有貨在手的看官們，應該扣好安全帶準備起飛了。