股海實戰：中升盈利保持高增長

港股又回復弱勢，恒指收報22,960點，跌315點，大市成交降至601億元，典型陰乾市！如今阿莊最擔心係繼抽身商品市場後，大鱷們下一步會否進一步減持股票，若然不幸言中，港股喺外資及北水「雙缺」嘅情況下，走勢堪憂。

上周沽出嘅中芯（00981），尋日下晝又有大盤掃上，阿莊都準備一旦踢穿0.94元就要再入場追貨，免得飛甩雞毛，誰知掃到上0.94元就止步，之後回落至0.89元收市，僅升1.14%，成交9.61億元。阿莊策略未變，即係話踢穿0.94元會考慮入場追貨，否則會靜候回試0.8元水平支持再分注翻兜。

旭光走樣炒家離場

另1隻中投之寶——旭光（00067）就大走樣，股價被狂質至3.69元收市，跌10.65%，成交達到6.34億元。唔少散戶喺4元樓上先至入場追貨，冷不防接下火棒，尋日午後跌勢尤急，唔少炒家打靶離場，短線3.5至3.6元不容有失，反彈上唔番4元樓上都係濕滯！

內地公布第六批節能汽車補貼名單，東風（00489）、比亞迪（01211）、廣汽（02238）及華晨（01114）均有車款入圍。本地車廠要喺節能汽車市場中較量，但相關競爭對海外中高端品牌銷售影響有限，皆因係兩個唔同嘅市場。反而，投資者宜觀察，喺整體銷情增長持續放緩之下，本地車廠減價促銷戰一觸即發，屆時兩個市場可能會更加走向極端，皆因奢侈品市場永遠係愈貴先至愈有人買！

積極擴展搶佔市場

中升（00881）主要經營4S經銷店，所謂「4S」即係汽車銷售、零部件、售後服務及資訊調查，其中汽車銷售代理業務為主要收入來源。公司主要集中代理中高端及高端汽車，如奔馳、保時捷、雷克薩斯、奧迪、蘭博基尼、豐田、日產及本田等，集團亦係豐田及雷克薩斯喺內地最大嘅汽車經銷商之一。

截至三月下旬，中升已喺東北、華北、華東及華南沿海，以及西南及西北等內陸地區，設有共98家4S店，去年純利突破10億元人民幣。

今年公司除繼續拓展一、二線城市外，還會積極喺三、四線城市發展中高端品牌，亦不排除透過購併，將4S經銷店數目增至130家以上，若然目標兌現，盈利可望保持較快增長。

中升股價自去年中由低位翻一番後，去年十一月見頂回落，但過去兩個月多次喺13.2至13.5元水平現支持，上周五一連重上10、50及250日線，尋日未受跌市影響，收報15.52元，升4.72%，成交7,776萬元，走勢偏強。

雖則話，呢隻股價位唔細，但炒股係講風險與回報，仙股夠平但冇發圍，一仙淨沽都冇人吼，呢個道理好易明白。睇圖表走勢同成交行事，短線回吐守穩14.7元可繼續炒上，目標上望18元，止蝕位14.3元。

戰報

哈爾濱動力（01133）

志強本月五日吼中嘅哈爾濱動力，尋日最高見過8.98元，跟佢喺推介日低位7.86元上車，累計賺逾14%。

Z-OBEE（00948）

錢進本月四日推介隻Z-OBEE，尋日抽高至1.99元，以推介當日低位1.76元計，已賺逾13%。