太子手記：少壯富豪榜最細24歲

專門發布富豪身家排名嘅胡潤研究院啱啱就發表咗佢哋首個《少壯派富豪榜》，一共有56位年齡細過四十歲嘅少壯派富豪上榜，有9人係「八十後」。入榜門檻身家最少要有10億元（人民幣．下同），除左騰訊（00700）主席馬化騰理所當然咁入榜之外，居然仲有林海峰同劉曉慶嘅名出現！

馬化騰擁320億居首

講緊嘅當然唔係香港DJ同內地女演員啦，而係東方日升公司嘅林海峰（三十六歲）同壹橋苗業嘅劉曉慶（二十四歲）。三甲位置就分別係馬化騰（三十九歲）、碧桂園（02007）執行董事楊惠妍（三十歲）同埋專門做LED嘅三安公司林志強（三十七歲）；佢哋三位嘅財富分別有320億元、240億元同埋150億元。

個榜仲提到有44人係白手興家，12人係「富二代」。楊惠妍就係排喺富二代嘅首位。

報告仲指，唔少富二代因個人財富難以計算而暫時排除喺榜外，娃哈哈董事長宗慶後個女宗馥莉、三一集團董事長梁穩根個仔梁在中、世茂集團董事長許榮茂個仔許世壇等。