Fundman睇市：歐舒丹增長故事動人

港府公布經濟數據，首季香江GDP升7.2%，高過分析員預期，主要受低息環境、最低工資加埋進口通脹拉動，政府同時將全年通脹預測由4.5%提高至5.4%。香港屬外向型經濟，通脹幾時見頂難以估計，但美國聯儲局主席伯南克講明QE2後，仲會有一段低息期，港元死跟美息底下，負利率不斷惡化，漸已形成唔靠炒炒賣賣搵食艱難的局面，存錢入銀行等於每年放棄3%的購買力，咁嘅環境，政府出幾多招壓抑樓市泡沫，結果都只係泥牛入海，最近愈來愈多人建議復建居屋。政府立場都幾硬淨，但筆者可以理解，試想從策劃到推出至少兩三年，屆時按市價加折扣定價，無運政府好大機會好心做壞事，再一次喺樓市高峰推一班苦主上車，買來二流私產一殼眼淚。筆者本來認為「置安心」的先租後買構思幾好，衰就衰在入屋門檻太高，計劃供應量太低，今日煲呔等收工，無殼蝸牛惟有自求多福，睇吓下任特首會唔會有一番作為。

黑色星期五，港股出現大奇迹日一洗近日頹風，早市恒指跌穿22,985點小雙底，以為大勢已去，殊不知下午期指大挾倉，恒指收23,276點，升202點，期指高低位相差543點，是近日罕見，而且亦由持續低水轉炒高水，收報23,283點，計埋除息因素，實際高水94點，可惜美股唔生性，上周五受歐債危機拖累銀行股，道指跌近百點。上周五無趁機食胡的好友，今日好可能風吹雞蛋殼，正正顯示愈近QE2玩完之日，股市走勢愈飄忽，做好做淡都唔容易。

股價重返震前水平

產銷L'occitane品牌化妝及護理產品的歐舒丹（00973），上周股價見異動，抽升1.31元報20.65元。由於日本是歐舒丹最大市場，三月發生的大地震及核洩漏事故引發拋售潮，股價從19.5元起步，最低跌至15.9元，但隨着管理層透露更多營運情況，例如大部分日本分店在地震後一星期已如常營業，以及日系護理產品因為部分消費者對核洩漏心理因素影響，帶來新商機，支持股價逐漸收復失地，重返災前水平。

歐舒丹生產地在法國，以天然及有機成分生產化妝品及護理產品，銷往全球80個國家，最大市場日本及美國分佔總銷售24%及13%，過去四年，產品毛利率介乎80.3至81.2%，這品牌享有極高及穩定毛利率走勢，或多或少反映品牌溢價高、成本及產品價格也相當穩定的事實。另一賣點，是拓展高速成長的內地市場，從香港近幾季同店銷售增幅都高於環球市場水平，分析員認為其品牌知名度在中國市場頗高，開展內地零售網絡事半功倍。

積極開發新興市場

歐舒丹首三季銷售額5.85億歐元，升26%，綜合分析員預測，三月底止全年增幅23.5%，至7.56億元，盈利9,992萬歐元，相當於一一年26.9倍市盈率，不算便宜。

不過，上市後公司準備投入更大資源在新興市場，包括中國、巴西、俄羅斯、印度及墨西哥，並進一步開發尚有增長空間的美國、英國、德國及韓國市場，一○年至一五年計劃增加650間分店，分店總數增加八成七，可以預期只要毛利率維持，開店進度按部就班，會是一個相當好的增長故事，問題只係在那個水平入市，按明年盈利增長24.6%，個人認為0.85至0.9倍PEG，會是這類增長股安全的收集區域，即大約19.2至20.4元。