旭光否認內訌交投照飆
芒硝生產商旭光（00067）呢兩日畀股東內訌傳聞困擾住，搞到公司要匆匆向投資者解畫，兼且出埋公司通告以正視聽，強調冇內訌，亦冇股東拋售股份，但呢頭講完，嗰頭就傳出有一名股東減持相當於兩億元嘅股份。
成交金額排第七
早兩日市場傳出，有旭光股東正透過歐資行安排，減持10億股股份，以市價計，總值40幾億元，搞到旭光股價即刻跌咗一成。管理層之後向投資者解畫，強調旭光股東之間並無內訌，又強調主要股東根本不能大規模售股。親自解畫都唔夠，仲出埋官方澄清公告，重申股東之間沒有任何未解決的爭議，且沒有任何主要股東擬出售10億股股份。
做晒工夫之後，尋日個價就升番2.7%，不過，旭光尋日成交金額超過11億元，位列第七大成交金額股份，仲勁過和黃（00013）、港交所（00388）。事有湊巧，又傳出有股東喺場外減持股份。