股海實戰：神數突破降軌展升浪

平生最怕見到「陰乾市」，偏偏身處其中。尋日恒指低開179點後反彈乏力，即使下晝政府賣地，大地主積極競投，拍賣成績唔差，亦無助刺激市況，恒指收報23,073點，跌218點，即月期指理論除權價更低水75點，大市成交僅677億元。

執筆期間，傳來人行加存款準備金率50點子，且看能否令籠罩股市嘅陰霾暫時得以消退。

尋日賣地，司徒拔道及元朗牛潭尾地皮分別由新地（00016）及長實（00001）投得，而九龍塘地皮則由中國海外（00688）投得，睇得主分量，成交具有指標性作用，而睇成交價，亦反映了大地主對後市看法樂觀，但地主股表現卻未見有起色，新地跌0.25%、長實跌1.2%、中國海外跌1.07%。

講開地主股，阿莊手持嘅恒地（00012），最近再度獲大股東出手增持，不過以昨日收市價51.8元計，距離公司發行嘅公司輪（00879）行使價58元有相當距離，由於呢隻輪喺六月一日將會到期（最後交易日則為本月二十七日），相信變廢紙嘅機會頗高。

回想阿莊喺三月下旬買入恒地，之後股價最高見過56.95元（仲收埋每股末期息0.7元），現價帳面仍有盈利；反觀隻公司輪同期由0.3元水平升過上1.42元，依家變成末日輪價格得番4.1仙，呢個真係炒輪「DOUBLE OR NOTHING」嘅典型例子。

恒地值得繼續持有

話說回頭，雖然錯過咗高位獲利嘅機會，但阿莊仍然相信，喺眾多大地主股之中，恒地係最抵買嘅一隻，所以會繼續持有。

講開組合持股，中芯（00981）宣布，參與武漢12吋晶圓合營項目，出資額約10億美金。尋日中芯股價曾一度高見0.94元，由於距離目標價1元不太遠，加上好消息已出，市況又唔多就，故上晝以平均價每股0.92元沽出手持嘅160萬股。

不過，阿莊依然相信，中芯自從換了高管和最近引入中投之後，呢隻股已脫胎換骨，長炒長有，會留意翻兜機會。

最近發掘另一隻心水股係神州數碼（00861）。呢隻股做IT產品分銷、系統、供應鏈以及相關服務業務，近年策略性擴大毛利率較佳嘅IT服務業務，成績有目共睹。除了核心業務增長外，人民幣持續升值，亦將為公司帶來不俗嘅匯兌收益。

核心業務維持增長

截至去年底止九個月，公司實現純利8.29億元，同比增長22.5%，已超過○九/一○年度全年盈利數字，估計一○/一一年度盈利可保持雙位數增長，現價預測市盈率約十五倍。

公司股價三月中成功下試250日線13.6元支持後展開反彈浪，已確認突破自去年末季以來嘅下降軌阻力，現價15.78元，建議分注收集，目標17至18元區域，止蝕14.5元。

戰報

志高控股

（00449）

志高尋日炒上高位0.89元，Sammi早於上周五已經叫大家吼實，跟佢於當日低位0.74元上車，賺逾兩成。

洛陽玻璃

（01108）

積奇上周二推介嘅洛陽玻璃，尋日一度搶高至4.48元，以推介日低位3.87元計，已賺近16%。