世紀佳緣遇無情股民
現代紅娘世紀佳緣尋日喺美國上市，但係同投資者間嘅緣分或者未夠，首日掛牌就跌破招股價，睇嚟啲投資者唔願意同公司「長相廝守」，只係想來個speed dating。
美國首掛即破底
婚戀網站世紀佳緣幫人做月佬，牽紅線，搞相睇活動。今次有i-banker幫佢同華爾街牽紅線，去到美國上市，世紀佳緣仲揀咗個股份代號叫DATE，個代號完全反映公司業務，令投資者易記啲；之不過，啲投資者真係淨係諗住同公司「DATE」（約會）， 揸多陣都唔肯，首日就掟貨走人，令到世紀佳緣首日股價一度跌咗成11%，結果收市都係破底收場，全日跌4%。
查實紅娘網真係有得做，以前就講「媒妁之言」，你就知媒人喺中國人嘅婚姻角色幾重要，再加上中國有成2億單身男女嘅市場。不過，外國投資者大概唔明到底個市場有幾咁渴求。