太子手記：商交所再添猛料會員
籌備達三載嘅商交所，終於守得雲開見月明，下周三（十八日）開業。尋日商交所就喺九龍站一家型格酒店，搵來初期一班經紀會員撐場，為下周正式開鑼造勢。
廣發南華期貨加盟
佢哋仲公布再增添多兩名新會員，包括廣發期貨（香港）同南華期貨（香港），令初期會員人數增至18名。
廣發期貨同南華期貨來頭不小，係內地兩間最大獲准喺本港經營期貨業務嘅公司。最近至加入廣發期貨做副總經理嘅丁世民都有現身，中銀國際副執行總裁謝湧海亦有撐場，兩人仲一同唱好商交所前景，商交所主席張震遠肯定喜上眉梢。
謝湧海話商交所喺戰略上具地理優勢，因為目前主要嘅黃金消費國家為中國及印度，上海現時只能進行境內嘅黃金交易，所以商交所對內地同國際投資者而言更具彈性。
商交所準備爭取短期再推人幣報價黃金期貨產品，商交所總裁艾伯特仲話會考慮推出能源、農產品好似咖啡豆或糖產品。