Fundman睇市：旭光展現完美升浪

佛誕假期，A股照常營業，再向2,900點關口行近一步，滬綜指收報2,890點，升18點。四月份內地貿易順差114.23億美元，比市場預期大，主要受進口增速放緩影響。內地分析員認為係祖國的調控政策發揮功效，經濟增長放緩的預期升溫，令內需放慢，適逢中美就貿易及匯率舉行年度會議，相信人民幣升值的壓力會更大。宏觀環境，早前PMI及大宗商品採購有回順迹象，睇情況內地通脹在未來一至兩季受到控制的機會增加，匯率加速升值連同通脹即將見頂的預期下，未來兩個月會唔會激起A股新一輪升浪，我們不妨拭目以待。

滙控（00005）首季業績都算掃興，純利升58%至41.53億美元，主要來自撥備及實際稅率比預期低，稅前溢利同比跌14%至49億美元，綜觀最令分析員跌眼鏡嘅，係成本對收入比率上升，較去年底升2個百分點，至60.9%，市場估滙控短期可能公布退出一兩個唔多賺錢嘅市場，以減低營運成本，提高資本回報。睇番股價，消息公布後好似坐過山車一樣，在倫敦由消息前的652.4便士，跌到638.9便士，執筆時美股未開市，無ADR參考價，但由倫敦股價睇，已差不多完全收復失地，相信今日開市只會「微軟」，對大市影響有限。

商品市場跌勢急勁

愈接近六月，美國QE2進入倒數，怕債息上升，商品市場反應最大，走勢認真得人驚，油價從接近115美元，短短幾日跌近20美元去到94.77美元，金價同樣由歷史高位插近110美元，去到1,462美元至拗腰回穩，本來一眾資源股都難逃一跌，但留意到旭光（00067）可算是「資源股」中的少數奇葩，由四月初2.9元左右起步，展示60度角的完美直線升浪，周一收報4.44元，一個月時間多啲累積升近五成三，誇張到暈。

旭光為全球最大芒硝生產商，由維基百科所知，芒硝是礦物，正式名稱是「十水合硫酸鈉」，簡單嚟講，這礦物主要用作洗衣粉生產，同時也可應用於玻璃、紡織行業及醫藥用途，目前中國是最大出產國，亦因為是「十二五」規劃中重點發展的新材料產業，旭光近日成為唔少基金在新材料板塊中的必然之選（說實話，筆者認識不少賓架，到目前還未弄清芒硝是何許物也）。

中投入股增添信心

年初旭光以每股2.81元批股，蛇吞象式收購大股東旗下芒硝下游產業中國高分子（主要以芒硝製作PPS塗料級樹脂、PPS注塑級樹脂及PPS纖維級樹脂等），初期市場反應一般，也曾跌穿批股價，四月突然展現完美升浪，跟上月中投入股其可換股債券不無關係，唔少之前對旭光新材料認知有限的基金和散戶，因而可以較安心地跟進。

以中投手上換股債息率回報6%，以預期每股盈利0.333元人民幣計，相當於大約8.9%盈利回報率。當然，萬一唔對辦，中投可以唔行使全身而退，但若以交易作為參考，股份回報同CB折讓收窄到10至15%，旭光確係有機會炒到去5.66至6元之間，有貨在手的，不妨以此作為食胡參考價。